Gazetari Milaim Zeka, në një lidhje të drejtpërdrejtë në emisionin “Ftesë në 5”, foli për vuajtjet e familjarëve të ish-krerëve të UÇK-së që ndodhen në paraburgim në Hagë, duke u ndalur veçanërisht te gjendja shëndetësore e bashkëshortes së Jakup Krasniqit. Zeka tha se bashkëshortja ndodhet në gjendje të rëndë shëndetësore dhe ngriti pyetjen pse Krasniqit nuk i jepet mundësia të qëndrojë pranë saj, edhe për “të paktën një javë ose dy javë”.
Ai kujtoi edhe të kaluarën e Krasniqit, të cilin tha e ka pasur profesor, dhe përmendi dënimin e tij në vitet 1981–1982 me 15 vite burg për aktivitetin politik, si dhe vuajtjet në burgjet jugosllave. Sipas Zekës, Krasniqi tashmë po i bën gjashtë vite në burgun e Hagës dhe është 76 vjeç. Ai theksoi se është e pamundur të imagjinohet çfarë vuajtjesh kanë kaluar gruaja dhe fëmijët e tij.
Zeka përmendi gjithashtu vështirësitë që përballen familjarët e ish-krerëve të UÇK-së në përpjekje për t’u takuar me të afërmit e tyre në Hagë. Ai solli në vëmendje rastet e bashkëshortes së Jakup Krasniqit, nënës së Hashim Thaçit, si dhe familjarëve të Rexhep Selimit dhe Kadri Veselit, duke theksuar pengesat e udhëtimit. “Është vuajtje për familjarët. Imagjinoni bashkëshorten e Jakupit, nënën e Hashim Thaçit, familjarët e Rexhep Selimit dhe Kadri Veselit, që duhet të ndërrojnë gjithë ata avionë për të arritur në Hagë,” tha Zeka.
Ai u ndal edhe te rëndësia emocionale e takimeve me të afërmit pas paraburgimit, duke vërejtur se vetëm ata që e kanë përjetuar mund ta kuptojnë peshën emocionale të këtyre takimeve. “Vetëm ata që e kanë provuar në lëkurën e tyre mund ta imagjinojnë se çfarë do të thotë të takosh partnerin pas grilave,” përfundoi Milaim Zeka. Top Channel transmetoi lidhjen.
