Presidenca e Partisë Popullore Europiane (EPP), familjes më të madhe politike në Europë ku bën pjesë edhe Partia Demokratike Kroate (HDZ), ka propozuar pezullimin e Partisë Progresiste Serbe (SNS) të Aleksandër Vuçiçit. Propozimi pritet të shqyrtohet në Asamblenë Politike të EPP-së më 7 dhe 8 dhjetor në Bruksel. Nëse miratohet, SNS do të humbasë të gjitha të drejtat e anëtarësimit, përfshirë të drejtën e votës, dhe do t’i jepet një afat njëvjeçar për të përmbushur shtatë kushte të vendosura; ndryshe, rrezikon përjashtimin e plotë nga familja politike, ku është anëtare që prej vitit 2016.
Mes kushteve që raporton media kroate Večernji list përfshihen distancimi nga trashëgimia e politikës së Sllobodan Millosheviçit, ndalimi i glorifikimit të kriminelëve të dënuar të luftës dhe i mohimit të gjenocidit në Srebrenicë dhe të krimeve të tjera të luftës. EPP kërkon gjithashtu që SNS të përafrojë politikën e saj të jashtme me atë të Bashkimit Europian, të ndërpresë mbështetjen ndaj politikave të Vladimir Putinit dhe të bashkëpunojë për një transferim paqësor të pushtetit në Serbi.
Në listën e shqetësimeve të EPP-së përfshihen edhe çështjet e lirisë së medias, korrupsionit dhe lidhjeve të pretenduara mes strukturave shtetërore dhe krimit të organizuar. Propozimin e ka përshëndetur Karlo Ressler, kreu i delegacionit të HDZ-së në Parlamentin Europian, i cili tha se EPP po ndërmerr hapa në përputhje me shqetësimet që partia e tij kishte ngritur prej vitesh.
Procedura e verifikimit të anëtarësimit të SNS-së nisi në shtator 2025 për shkak të shqetësimeve mbi gjendjen e demokracisë në Serbi, trajtimin e protestuesve dhe respektimin e vlerave europiane. Reagimet ndaj partisë u shtuan pas pjesëmarrjes së zyrtarëve të lartë serbë në ceremoninë mortore të Ratko Mlladiçit, të dënuar me burgim të përjetshëm për gjenocidin në Srebrenicë dhe krime të tjera lufte. Vendimi përfundimtar pritet në mbledhjen e 7-8 dhjetorit; nëse kushtet nuk përmbushen brenda një viti, SNS mund të përballet me përjashtimin e plotë nga EPP. Një precedent i ngjashëm përmendet rasti i Fidesz të Viktor Orbanit, i pezulluar nga EPP në 2019 dhe larguar më pas në 2021.
