Deutsche Bank, institucioni më i madh financiar në Gjermani, po përballet me akuza të reja pas publikimit të mbi 15 milionë dokumenteve të brendshme që, sipas mediave ndërkombëtare, zbulojnë praktika të dyshimta biznesi, mangësi në kontrollet kundër pastrimit të parave dhe marrëdhënie të diskutueshme me klientë të fuqishëm. Dokumentet, analizuar nga media si Der Spiegel, ZDF, The New York Times dhe Financial Times, përfshijnë mbi nëntë milionë e-mail-e, raporte dhe shënime të brendshme.
Sipas raportimeve, banka ka shpërfillur paralajmërime të brendshme për marrëdhënie biznesi problematike. Materialet hedhin dritë mbi lidhje me oligarkë rusë dhe mbi marrëdhënie shumëvjeçare me figura si Jeffrey Epstein dhe presidenti amerikan Donald Trump. Në dokumente përmenden gjithashtu skema të diskutueshme të optimizimit tatimor të ofruara për klientë të pasur, si dhe marrëveshje në sektorin e armatimeve.
Një tjetër pikë që shfaqet në dokumente është mbajtja e llogarive për donacionet e partisë gjermane AfD, pavarësisht kundërshtimeve të brendshme në bankë. Publikimi i këtyre të dhënave pati ndikim të menjëhershëm në tregjet financiare: aksionet e Deutsche Bank ranë deri në 6,2 për qind, duke e kthyer bankën në humbësen më të madhe të përkohshme të indeksit DAX.
Përkundër përmbajtjes së dokumenteve, vetë banka ka minimizuar rëndësinë e zbulimeve, duke argumentuar se rastet i përkasin periudhave të mëparshme dhe se nuk pret pasoja të konsiderueshme financiare. Nga materialet del edhe se disa vendime brenda bankës kundërshtoheshin në mënyrë të brendshme, por sipas raportimeve këto kundërshtime nuk bënë që praktikat e kontestuara të ndërpriten.
Publikimi i masiv i dokumenteve dhe vlerësimet e mediave ndërkombëtare kanë sjellë një rritje të vëmendjes ndaj praktikave të bankës, ndërsa diskutimet mbi pasojat ligjore, reputacionale dhe financiare vazhdojnë të jenë në fokus.
