Shenzhen është kthyer në qendrën e diplomacisë dhe ekonomisë ndërkombëtare me nisjen e samitit APEC 2026, ku përfaqësuesit e 21 ekonomive të rajonit Azi-Paqësor diskutojnë të ardhmen e tregtisë, investimeve dhe rritjes ekonomike në një kontekst të tensioneve tregtare dhe pasigurisë globale. Përtej axhendës ekonomike, vëmendja ndërkombëtare është përqendruar te një takim i pritshëm mes presidentit amerikan Donald Trump, presidentit rus Vladimir Putin dhe presidentit kinez Xi Jinping.
Top Channel, brenda ambienteve të samitit, sjell pamje nga qendra mediatike me ekrane gjigante për ndjekjen e aktiviteteve, ku gazetarë nga vende të ndryshme janë të pranishëm. Interesi i medias dhe i komunitetit ndërkombëtar shtrihet përtej diskutimeve ekonomike drejt takimit të tre liderëve të fuqive të mëdha.
Në planin ekonomik, pritshmëritë nga samiti lidhen me forcimin e tregtisë së lirë, rritjen e investimeve dhe përmirësimin e bashkëpunimit mes ekonomive të rajonit. Një çështje kryesore është përballimi i tensioneve tregtare dhe rritjes së proteksionizmit, fenomene që kanë krijuar pasiguri për bizneset dhe zinxhirët ndërkombëtarë të furnizimit. Liderët pritet të diskutojnë gjithashtu integrimin ekonomik rajonal, lehtësimin e procedurave doganore, lidhjet infrastrukturore dhe mundësitë për zgjerimin e tregtisë ndërkufitare.
Një tjetër prioritet i rëndësishëm i samitit është inteligjenca artificiale dhe transformimi digjital; APEC synon të nxisë përdorimin e teknologjive të reja në industri, shërbime dhe sektorin publik, duke i konsideruar si motorë të rinj të produktivitetit dhe rritjes ekonomike. Në axhendë përfshihen gjithashtu siguria energjetike, siguria ushqimore dhe zhvillimi i qëndrueshëm.
Më 19 nëntor pritet zhvillimi diplomatik i takimit mes Donald Trump, Vladimir Putin dhe Xi Jinping. Sipas Kremlinit, ky takim do të mbahet në rezidencën zyrtare të presidentit Xi Jinping dhe jo në godinën kryesore të samitit. Në tryezën e tre liderëve pritet të diskutohen çështje të sigurisë ndërkombëtare, çarmatimit bërthamor dhe zhvillimeve në konfliktet globale; Trump ka shprehur interes për diskutime mbi reduktimin e armëve bërthamore, ndërsa çështjet e luftës në Ukrainë dhe konfliktit me Iranin mbeten në sfondin e tensioneve ndërkombëtare.

