Prokuroria italiane në Caltanissetta po heton ish-shefin e Policisë së Shtetit, Gianni De Gennaro, për dyshime për pengim të drejtësisë dhe devijim të hetimeve lidhur me masakrën e Via D’Amelio-s, ku më 19 korrik 1992 u vra Paolo Borsellino me pesë anëtarë të eskortës së tij. Hetimi përfshin dyshime se De Gennaro, i njohur si “Peshkaqeni” dhe një bashkëpunëtor i afërt i gjyqtarit Giovanni Falcone, ka ushtruar presion mbi informatorin e mafies, Salvatore Contorno, që të mos dëshmojë, si dhe fshehje dhe asgjësim dokumentesh që mund të ndihmonin zbardhjen e ngjarjeve.
Prokuroria kishte kërkuar arrestimin e De Gennaros dhe disa personave të tjerë, por gjyqtari për hetimet paraprake rrëzoi kërkesën; organi i akuzës e kundërshtoi vendimin dhe çështja pritet të shqyrtohet nga Gjykata e Rishikimit më 1 dhjetor. Hetimi vë në qendër të tij dyshimet për një marrëveshje heshtjeje me Contornon, ish-anëtar të Cosa Nostra-s dhe më pas bashkëpunëtor të drejtësisë, të cilit, sipas prokurorëve, i është bërë presion që të mos flasë për ngjarje të vitit 1989 dhe për rrethanat që paraprinë atentatet e 1992.
Hetuesit përmendin gjithashtu kontakte të zhvilluara gjatë vitit 2025, para se Contorno të thirrej nga prokurorët; më 15 maj të atij viti ai zgjodhi të mos përgjigjej gjatë marrjes në pyetje. Një tjetër pistë fokusohet në fshehjen dhe asgjësimin e materialeve të mundshme evidencuese, përfshirë shënime, materiale gjyqësore dhe dokumente lidhur me arrestimin e Contornos në 1989 dhe me të ashtuquajturin “Korbi i Palermos”.
Si element kyç përmendet zhdukja e “Axhendës së kuqe” të Paolo Borsellinos, e cila u humb pas atentatit të 19 korrikut 1992 dhe nuk është gjetur; në të gjyqtari mbante shënime dhe reflektime që mund të kishin rëndësi për hetimet mbi mafien. Hetuesit po rishqyrtojnë edhe rolin e Arnaldo La Barberas, ish-kreut të Skuadrës Lëvizëse të Palermos, dhe marrëdhëniet e tij me De Gennaron, si dhe ndikimin e deklarimeve të rreme të Vincenzo Scarantinos që sipas hetimeve të mëparshme kanë devijuar procedurat hetimore.
De Gennaro, me karrierë rreth 50-vjeçare në poste të larta shtetërore, ka bashkëpunuar në hetimet e “Maxi-Procesit”, ka drejtuar Policinë e Shtetit (2000–2007), shërbimet e inteligjencës (DIS) dhe ka qenë president i Leonardos (2013–2020). Hetimi vë në pah kontrastin mes imazhit të tij si figurë kryesore në luftën kundër Cosa Nostra dhe akuzave që lidhen me ngjarjet e errëta të antimafias italiane.

