SPAK ka përfunduar hetimet për ish‑zëvendëskryeministren dhe ish‑ministren e Infrastrukturës dhe Energjisë, Belinda Balluku, dhe këtë të hënë ka dorëzuar në gjykatë kërkesën për gjykim. Lajmin e bëri të ditur kreu i SPAK, Klodian Braho, gjatë një takimi me gazetarët, i shoqëruar nga prokurorët e çështjes, Dritan Prençi dhe Dorina Bejko. Në hetim ishin angazhuar dy prokurorë dhe dhjetë hetues.
SPAK ka dërguar kërkesën për gjykim ndaj Ballukut, 25 personave të tjerë dhe dy shoqërive. Hetimet, sipas prokurorit Prençi, janë përqendruar në dhjetë procedura, përfshirë Tunelin e Llogarasë, lotet e Unazës së Madhe dhe prokurimin për Albcontrol. Në një procedurë me fond limit rreth 18 miliardë lekë, hetimi dyshon se Balluku, edhe pse kompetencat i kishin kaluar struktura të tjera, ka vijuar të ndiqte dhe orientonte procedurat me qëllim paracaktimin e kompanisë “Intecar SRL”. Anëtarët e Komisionit të Vlerësimit të Ofertave të përmendur janë Gentian Gjylit, Mirzeta Kashnica dhe Evis Berberi, ndërsa Viola Haxhiademi akuzohet se ka miratuar preventivin me çmime të fryra, në kundërshtim me vendimet e Këshillit të Ministrave dhe rregullat teknike. Sipas prokurorisë, fondi limit është përllogaritur gabim me rreth dy miliardë lekë dhe, si pasojë, shtetit i është shkaktuar dëm rreth 5 miliardë lekë.
Akuzat kundër Ballukut përfshijnë korrupsionin në nëntë raste, fshehjen e pasurisë në dy raste dhe pastrimin e parave. Vlera e pasurive të sekuestruara arrin 1.8 milionë euro. Prençi deklaroi se hetimet kanë nxjerrë shenja të përfitimeve të dyshimta pas ndërtimit të një lote, ku Balluku ka në pronësi familjare një vilë 428 m2, investim që dyshohet të jetë fshehur fillimisht përmes Igli Tares e më pas Arbër Abazit. Përfitimet e pretenduara për Igli Taren, rreth 250 mijë euro, nuk janë pasqyruar në deklaratat e pasurisë.
Prokurorja Dorina Bejko përmendi procedura të tjera: në një rast me fond rreth një miliard lekë dyshohet favorizimi i subjektit “G SHPK” me përfshirjen e Evis Berberit dhe Miranda Shkurtit; në prokurimin për Albcontrol, sipas hetimeve, Balluku si drejtuese ka paracaktuar fituesin në favor të shoqërisë “Eurocol”. Nga ky proces hetimor rezulton edhe një vilë tjetër në Gjilekë, përfitim i lidhur me një kontratë të firmosur nga Igli Tare.
Braho sqaroi se SPAK kishte kërkuar më parë autorizim nga Kuvendi, por kërkesa ishte rrëzuar nga Këshilli i Mandateve, çka detyroi prokurorinë të respektojë vendimin. Megjithatë, hetimet vazhduan dhe SPAK dokumentoi tri akuza të reja që nuk ishin pjesë e kërkesës fillestare. Ai pohoi se aktualisht nuk ka hetime të tjera ndaj Ballukut përtej çështjes që dërgohet për gjykim; Aeroporti i Vlorës mbetet çështje nën hetim.
