Komisionerja europiane për Zgjerimin, Marta Kos, vuri në dukje rëndësinë strategjike të zgjerimit të Bashkimit Evropian dhe paralajmëroi për përpjekjet e Rusisë për ta penguar këtë proces. Në fjalimin e saj gjatë Forumit të Zgjerimit në Bruksel ajo bëri thirrje për një Europë më të bashkuar e më të fortë, në mënyrë që të jetë e aftë të përcaktojë vetë të ardhmen e saj.
“Zgjerimi i sotëm po zhvillohet në një mjedis gjeopolitik shumë më konkurrues. Përballemi me kundërshtarë që duan të pengojnë këtë proces dhe të dëmtojnë vendet kandidate, por objektivi kryesor jemi ne, Bashkimi Evropian. Mbi të gjitha, Rusia, e cila dëshiron të përmbysë procesin e bashkimit evropian. Dhe ju e dini cila është përgjigjja jonë ndaj kësaj. Ne nuk do ta lejojmë një gjë të tillë të ndodhë,” tha Kos.
Ajo nënvizoi nevojën për të shfrytëzuar momentin për të ndërtuar “një Evropë më të madhe dhe më të fortë, e aftë për të përcaktuar vetë të ardhmen e saj,” dhe ngriti pyetjen retorike se çfarë Europe dëshirohet për t’u lënë brezave të ardhshëm. Kos theksoi se Europa nuk mund të qëndrojë në vend, ndërsa bota gjeopolitike ndryshon në mënyrë dramatike, dhe pyeti nëse mund t’i lejohet vetes mos përfundimi i procesit të bashkimit.
Ajo përmendi pjesëmarrjen e jashtëzakonshme në sallë — presidentë, kryeministra, ambasadorë, ministra, përfaqësues të medias dhe biznesit — duke theksuar se kjo dërgon një mesazh: politika është rikthyer te zgjerimi. Historikisht, tha Kos, zgjerimi ishte përgjigjja e Europës ndaj përfundimit të Luftës së Ftohtë dhe solli pranimin e 13 shteteve të reja anëtare.
Sipas saj, sot zgjerimi është pjesë e një debati më të gjerë mbi mënyrën e formësimit të të ardhmes së Europës për të garantuar paqen, lirinë dhe mirëqenien për dekadat e ardhshme. Kos vuri në dukje shpejtësinë me të cilën disa vende kandidate po ecin përpara dhe deklaroi se “vetëm këtë vit kemi arritur më shumë rezultate se në çdo vit tjetër gjatë 25 viteve të fundit.”
