Fenomeni El Niño pritet të shkaktojë pasoja të rënda globalisht, me parashikime që e rendisin si një nga episodet më të fuqishme në të paktën 1,000 vitet e fundit. Ndërsa kriza klimatike përkeqësohet, El Niño pritet të shtojë thatësira, përmbytje, zjarre dhe mungesë ushqimi në shumë rajone. Alarmi u ngrit në bisedimet e OKB-së për klimën, COP31 në Turqi, ku përfaqësues të organizatave ndërkombëtare dhe aktivistë kërkuan masa urgjente, veçanërisht për vendet më të varfra dhe më të ekspozuara.
El Niño është fenomen natyror i përsëritshëm, i karakterizuar nga ngrohja e pazakontë e ujërave në pjesën lindore të Oqeanit Paqësor, por ndikimi i tij mund të jetë global për ndryshimet e modeleve të reshjeve dhe temperaturave. Pasojat janë bërë tashmë të dukshme: Indonezia përballet me zjarre të mëdha dhe dëmtime të të korrave; në SHBA janë regjistruar përmbytje bregdetare; Sudan po përjeton përkeqësim të thatësirës; Ekuadori dhe Somalia janë goditur nga përmbytje të konsiderueshme.
Sekretarja e përgjithshme e Organizatës Botërore Meteorologjike, Celeste Saulo, paralajmëroi që ndryshimet klimatike po e bëjnë fenomenet ekstreme edhe më të rrezikshme: “Ne po e mbingarkojmë motin tonë dhe El Niño do të jetë një shumëzues rreziku”. Një nga vendet më të prekura pritet të jenë Ishujt Marshall, ku thatësia ka shkaktuar krizë të furnizimit me ujë dhe është shpallur gjendje e jashtëzakonshme. Përfaqësuesja e klimës aty, Kathy Jetn̄il-Kijiner, tha se thatësia i shtohet kërcënimit nga rritja e nivelit të detit, që rrezikon banesat dhe burimet e ujit.
Shqetësim tjetër është mungesa e financimit për vendet në zhvillim. Edhe pse shtetet e pasura premtuan trefishimin e fondeve për përshtatje, shumat janë larg nevojave. Sipas vlerësimeve, deri në 2035 nevojiten rreth 305 miliardë dollarë në vit për të ndihmuar vendet më të varfra të përballojnë pasojat. UNHCR paralajmëron se deri në 3 milionë persona mund të zhvendosen në Lindjen e Afrikës (Kenia, Somali, Sudani i Jugut, Uganda). Në Kenia prodhimi i misrit ka rënë me 40%, duke rritur rrezikun për ushqimin. Klimatologu Bill Hare paralajmëroi se El Niño mund të përshpejtojë ndjesinë e ngrohjes globale dhe të rrisë krizën humanitare. Fenomeni pritet të arrijë kulmin në dhjetor, me ndikime që do të vazhdojnë gjatë vitit të ardhshëm; pasojat kryesore do të jenë temperatura ekstreme, reshje jo normale, dëmtim të të korrave dhe zbardhje koralesh. Organizatat mjedisore kërkojnë mbështetje konkrete në terren, jo vetëm premtime diplomatike.
