Edicioni i 10-të i Maratonës së Tiranës mblodhi rreth 5,800 pjesëmarrës nga vende të ndryshme, duke kthyer kryeqytetin në një arenë të madhe sportive. Organizuar nga Bashkia e Tiranës, maratona shënoi një pjesëmarrje të gjerë në kategori të ndryshme dhe prezantoi si risinë e këtij viti garën prej 5 kilometrash, e cila synon të rrisë mundësitë e pjesëmarrjes për qytetarët.
Një nga momentet qendrore ishte vlerësimi i grupit “Wee To”, të përbërë nga persona me aftësi të kufizuara, të cilët morën pjesë dhe përcollën një mesazh për përfshirjen dhe mundësitë e barabarta në sport. Pjesëmarrja e këtij grupi u theksua si dëshmi që sporti nuk njeh barriera dhe se vullneti për të qenë pjesë i aktiviteteve sportive është i pranishëm pavarësisht kufizimeve fizike. Çmimet për pjesëmarrësit e “Wee To” u ndanë nga nënkryetarja e Bashkisë, Etleva Bisha.
Bisha vlerësoi mesazhin e dhënë nga grupi: “Ata sot kanë dhënë një mesazh shumë të madh për gjithë banorët e Tiranës, por pse jo edhe të gjithë Shqipërisë: edhe aty ku dikush mund të duket se ka një aftësi të kufizuar, në vetvete është person si gjithë të tjerët dhe ka aftësitë dhe mundësinë për të dhënë e për të kontribuar për jetën e qytetit dhe të komunitetit.” Ajo theksoi gjithashtu angazhimin e Bashkisë për krijimin e një qyteti më të aksesueshëm dhe gjithëpërfshirës, përmes eliminimit të barrierave fizike dhe shtimit të mundësive për pjesëmarrje të personave me aftësi të kufizuara në aktivitetet sportive dhe në jetën komunitare.
Për mbarëvajtjen e eventit u angazhuan strukturat e Policisë Bashkiake dhe Policisë së Shtetit, ndërsa përgjatë itinerarit u aplikuan kufizime të përkohshme të qarkullimit për të garantuar sigurinë e pjesëmarrësve. Edicioni i 10-të përcolli frymën e garës dhe të një jete aktive, si dhe mesazhin se sporti është një mundësi për të gjithë, pa dallim moshe apo aftësie.
