Një debat i ashpër u zhvillua në emisionin “Goca dhe Gra” ndërmjet këngëtares Jonida Maliqi dhe psikologes Anjeza Dishnica, për trajtimin e fëmijëve në spektrin e autizmit. Përplasja lidhej edhe me përvojën personale të Maliqit, e cila ka një djalë në spektrin e autizmit dhe shprehu shqetësime për mënyrën se si familja ishte trajtuar dhe informuar gjatë procesit të vlerësimit. Diskutimi u fokusua te rëndësia e vlerësimit të saktë, ndërhyrjeve terapeutike dhe mbështetjes së vazhdueshme për këta fëmijë. Dishnica theksoi se vlerësimet duhet të kryhen nga ekipe multidisiplinare dhe prindërit duhet të informohen për trajtimin e përshtatshëm.
Gjatë bisedës, Dishnica përmendi edhe përvojën e saj profesionale, duke thënë se në vitin 2009 kishte qenë drejtoresha e parë e qendrës që kishte ngritur dhe drejtuar, para se të ndërronte drejtim profesional. Ajo i drejtoi Maliqit pyetje rreth terapisë që kishte ndjekur djali i saj dhe mbështetjes që kishte marrë familja pas identifikimit të vështirësive. Psikologia sqaroi se terapia ABA aplikohet në Shqipëri që prej vitit 2014 dhe përfshin zhvillimin e aftësive individuale të fëmijës dhe më pas procesin e socializimit, i cili mund të jetë veçanërisht sfidues për fëmijët në spektrin e autizmit.
Debati u tensionua kur u kërkuan sqarime mbi pretendimin e Jonidës se diagnoza e fëmijës së saj ishte përcaktuar nga vetë specialistja. Maliqi deklaroi se mënyra e komunikimit të informacionit për të birin e kishte traumatizuar atë dhe bashkëshortin, duke ndikuar në besimin e tyre ndaj profesionistëve si në aspektin profesional, ashtu edhe njerëzor. Në një moment, Jonida akuzoi drejtpërdrejt Dishnicën se i kishte thënë se i biri “nuk do të bëhet kurrë” dhe se i ishte rekomanduar të ndiqte pesë deri gjashtë orë terapi në ditë në qendrën e psikologes, si dhe të mos e dërgonte në kopsht e shkollë. Maliqi akuzoi gjithashtu se trajtimi kishte elemente komerciale, duke thënë se “i ke parë fëmijët si bankomate”.
Nga ana tjetër, Dishnica deklaroi se problemet i kishte identifikuar që nga kontakti i parë me familjen dhe se procesi i identifikimit nis në takimin fillestar.
