Rusia ka rikthyer në tryezën e negociatave kërkesat e saj të vjetra ndaj NATO-s, duke kërkuar tërheqjen e trupave nga krahët lindorë të Aleancës, përfshirë Poloninë dhe vendet baltike. Sipas një raportimi të The New York Times, që citon një dokument të siguruar nga zyrtarët rusë, Moska përsëriti gjatë bisedimeve në Abu Dhabi një sërë kërkesash që kishte paraqitur edhe dy muaj para nisjes së pushtimit të Ukrainës, në fillim të vitit 2022.
Një nga kërkesat kryesore është që forcat e NATO-s të tërhiqen nga pozicionet ku janë vendosur pas vitit 1997, përpara zgjerimit të Aleancës drejt kufijve rusë. Ky kërkesë vendos sigurinë evropiane në qendër të negociatave dhe tregon se Kremlini kërkon që shqetësimet e tij ndaj NATO-s dhe Ukrainës të trajtohen para se të arrihet ndonjë marrëveshje për ndërprerjen e armiqësive. Dokumenti, i datës 10 nëntor, jep një pasqyrë të qëndrimit fillestar të Rusisë në negociata.
Burime të përfshira në bisedime thanë se përfaqësuesit rusë në Abu Dhabi laçuan të kuptohet se presidenti Vladimir Putin mund të jetë i gatshëm për njëfarë fleksibiliteti, megjithatë nuk është dhënë ndonjë detaj konkret mbi lëshimet e mundshme. Gjatë diskutimeve, zyrtarët rusë paraqitën edhe Luftën e Ftohtë dhe Paktin e Varshavës si një model të mundshëm për rendin evropian pas përfundimit të luftës në Ukrainë, duke përmendur ndarjen e Evropës në sfera ndikimi mes Shteteve të Bashkuara dhe Bashkimit Sovjetik dhe mekanizmat e asaj periudhe si mjete që dikur kanë ulur rrezikun e një konflikti të drejtpërdrejtë.
Përfaqësuesit amerikanë u kanë kërkuar rusëve të mos mbështeten te modelet e së kaluarës, por të përqendrohen te zgjidhjet për të ardhmen. Dokumenti vë në dukje gjithashtu se ofertat dhe stimujt ekonomikë të paraqitur Vladimir Putinit nga të dërguarit e presidentit amerikan Donald Trump, Jared Kushner dhe Steve Witkoff, nuk kanë sjellë deri tani lëshime konkrete nga Moska. Këmbëngulja e Rusisë për të trajtuar çështjen e zgjerimit të NATO-s tregon se objektivat e Kremlinit shtrihen përtej territoreve ukrainase dhe synojnë rishikimin e arkitekturës së sigurisë në Evropë.
