Kryeministri Edi Rama kritikoi qasjen diplomatike të Bashkimit Evropian ndaj Rusisë, duke theksuar se përveç mbështetjes ushtarake për Ukrainën, Evropa duhet të mbajë të hapur edhe kanalet e dialogut me Moskën. Deklaratat i bëri para samitit në Dublin, ku sipas tij foli edhe për rrugëtimin evropian të Shqipërisë.
Rama tha se mbështetja për Ukrainën është e drejtë, por nuk duhet të përjashtojë bisedimet me Rusinë, pavarësisht zhvillimeve dhe marrëdhënieve aktuale mes palëve. Ai vuri në dukje se diplomacia është lënë jashtë dhe se është bërë një gabim që fokusimi të jetë vetëm në ndihmën ushtarake: “Pyetja nuk është se kujt mund t’i besojmë. Pyetja është se çfarë është në interesin tonë më të mirë si komunitet evropian. Unë besoj se është bërë një gabim shumë i madh që diplomacia iu është lënë në dorë, iu është jashtë kontraktuar të tjerëve dhe ka një përqëndrim vetëm për mbështetje ushtarake për Ukrainën, që është gjëja e duhur për t’u bërë, pa mbajtur të hapur një kanal bisedimi me Rusinë.”
Ai shtoi se, pavarësisht preferencave, Rusia nuk do të largohet dhe do të mbetet faktor në skenën evropiane: “Na pëlqen apo jo, Rusia nuk do të shkojë asgjëkundi. Do të vazhdojë të qëndrojë aty. Dhe e ardhmja e kontinentit është një e ardhme e përbashkët për të cilën duhet të punojmë duke shfrytëzuar të gjitha mjetet dhe ndërkohë që mbështesim gjatë tërë kohës Ukrainën, na duhet të bisedojmë.”
Në pjesë të tjera të deklaratës, Rama shfaqi vlerësim për mikpritjen dhe rolin e vendit pritës, duke përmendur edhe presidencën e tij në Bruksel si të dobishme: “Është një kënaqësi e madhe që gjendem në këtë vend të mrekullueshëm… që aktualisht është vendi që drejton shfaqjen në Bruksel me presidencën e vet që ka qenë shumë e dobishme.” Ai përmendi gjithashtu rëndësinë e funksionimit sipas rregullave dhe ligjeve në vendet demokratike, duke theksuar se ngjarjet e fundit lidhen me përpjekjet për të respektuar këto rregulla dhe ligje.
