Një 16-vjeçare, Chloe Dransfield, u vra me thikë në Leeds, Angli, pas një përballjeje që prokuroria dyshon se lidhej me një marrëdhënie dashurie mes saj dhe një 18-vjeçareje, Kayla Smith. Sipas provave të paraqitura në Gjykatën e Kurorës në Leeds, Chloe dyshohet se është goditur pesë herë me thikë në shpinë dhe qafë nga Smith. Raportohet gjithashtu se një tjetër i ri, Blake Dowling, 18 vjeç, i cili kishte qenë në lidhje me të dyja vajzat, ka pasur rol në organizimin e përballjes dhe e kishte dërguar Smith në vendin ku ndodhi ngjarja, pavarësisht dijenisë për armiqësinë mes tyre, sipas The Sun.
Prokuroria thotë se orët para vrasjes dy vajzat shkëmbyen mesazhe dhe kërcënime të vazhdueshme. Gjatë një telefonate në FaceTime, Smith dyshohet t’i ketë thënë Chloe-s: “Do të të ngul thikën në fyt”, dhe Chloe i kishte thënë se nuk kishte frikë. Pamjet e kamerave të sigurisë tregojnë Smith-in që doli nga banesa rreth orës 05:10, e veshur me pizhame dhe duke mbajtur një objekt të shndritshëm që prokuroria pretendon se ishte thikë.
Në vendngjarje ishte edhe Archie Rycroft, 20 vjeç, i cili dyshohet se ndoqi Smith-in, tentoi ta filmonte përballjen dhe e inkurajoi 18-vjeçaren të ushtronte dhunë. Pas sulmit, Smith dhe Rycroft u kthyen në banesën e saj; gjyshi i 18-vjeçares tha se do të telefononte policinë dhe ajo i tha se Chloe kishte vdekur. Ambulanca u thirr rreth orës 05:48, rreth 37 minuta pas goditjes. Chloe u dërgua me urgjencë në spital, por ndërroi jetë në orën 06:40.
Prokuroria pretendon se Dowling luajti rol në organizimin e përballjes, duke e çuar Smith-in me qëllim përballjen fizike, ndërsa Rycroft akuzohet për inkurajim të dhunës dhe për përpjekje për ta dokumentuar ngjarjen. Kayla Smith pranon se e ka goditur 16-vjeçaren dhe se i ka shkaktuar plagën fatale, por mohon se kishte qëllim ta vriste ose t’i shkaktonte dëmtime të rënda; ajo është deklaruar fajtore për vrasje të paqëllimshme, por mohon akuzën e vrasjes.
