Brukseli po kërkon që Londra të paguajë më shumë se shuma prej 662 milionë stërlinash, që ishte premtuar Francës, si pjesë e suksesit të Planit të Veprimit të BE për frenimin e kalimeve me gomone drejt brigjeve angleze. Sipas mediave britanike, kjo kërkesë u gjet e fshehur në një dokument të dalë në publik, Deklaratën e Përbashkët të hartuar para Samitit për ristartimin e marrëdhënieve BE-Britani pas Brexit-it, që mbahet më 20 nëntor.
Opozita në Britani e ka cilësuar si të turpshme këtë kontribut shtesë nga qeveria, ndërsa publikisht reagimet janë të forta për efektivitetin e financimeve, pasi emigrantët vazhdojnë të mbërrijnë në numra të mëdhenj. Vetëm këtë vit, deri tani, janë regjistruar rreth 23 mijë raste kalimesh përmes La Manshit.
Kjo kërkesë për pagesë shtesë bëhet në kuadrin e Planit të Veprimit që BE nisi në qershor, në bashkëpunim me Francën, Belgjikën, Gjermaninë dhe Hollandën, me qëllim luftën kundër migracionit ilegal. Kërkesa për një kontribut financiar nga Britania mbetet pjesë e qëndrimit negociues të BE-së ndaj qeverisë britanike, dhe do të kërkohet një përgjigje zyrtare nga ana e Londrës se a do të pranojë të shtojë pagesat.
Në prag të samitit, kryeministri Andy Burnham po përgatitet për arritjen e një marrëveshjeje me Brukselin mbi tregtinë e artikujve ushqimorë, energjetikën dhe lëvizjen e të rinjve ndërmjet Britanisë dhe vendeve të BE-së. Burnham ka thënë se do të përcaktojë opsionet për marrëdhëniet afatgjata me BE-në dhe ka shprehur dëshirën që Britania të rifutet në BE gjatë jetës së tij.
Një zëdhënës i qeverisë britanike deklaroi se nuk komentojnë dokumenta të dala në publik apo negociata që ende po zhvillohen. Samiti i 20 nëntorit pritet të jetë momenti kur do të mësohet përfundimisht nëse Britania do të shpenzojë më shumë se 662 milionë stërlina të dhëna deri tani Francës, ndërsa sfida e kalimeve ilegale përmes La Manshit vijon.
