Kryeministri izraelit Benjamin Netanyahu dhe presidenti amerikan Donald Trump zhvilluan një telefonatë të tensionuar gjatë fundjavës, me në qendër mundësinë e rifillimit të operacioneve ushtarake kundër Iranit. Lajmi u raportua nga media izraelite Ynet, e cila i referohet burimeve me njohuri mbi përmbajtjen e bisedës. Sipas raportimeve, dy liderët patën mosmarrëveshje mbi qëndrimin që duhet të mbajë Uashingtoni ndaj Teheranit: Netanyahu insistonte për rifillimin e sulmeve ushtarake, ndërsa Trump ishte më i prirur t’u japë kohë përpjekjeve diplomatike për arritjen e një marrëveshjeje me Republikën Islamike.
Më herët, Axios, Associated Press dhe Financial Times kishin raportuar mbi përpjekjet e Netanyahut për të bindur presidentin amerikan që të rifillonte operacionet ushtarake pas zgjedhjeve të mesmandatit në SHBA. Sipas burimeve të cituara nga Ynet, telefonata e fundjavës ishte veçanërisht e vështirë dhe përfshiu shkëmbime të ashpra replikash mes dy liderëve; një prej burimeve e përshkroi atë si një “shkëmbim britmash nga ferri”.
Zyra e kryeministrit izraelit hodhi poshtë disa nga këto pretendime, duke i përshkruar si “lajme të rreme dhe marrëzi të pastër”. Një zyrtar i lartë izraelit konfirmoi megjithatë se telefonata ka ndodhur, por nuk e pranoi që ajo të ketë qenë kaq e ashpër.
Ndërkohë, Netanyahu përballet edhe me pasiguri në frontin e brendshëm politik: pas zgjedhjeve parlamentare të 27 tetorit, koalicioni i tij nuk siguroi shumicën e nevojshme për të formuar qeverinë. Presidenti izraelit Isaac Herzog i dha më 8 nëntor liderit të opozitës Gadi Eizenkot mandatin për formimin e qeverisë së re. Eizenkot ka 28 ditë kohë për të siguruar mbështetjen parlamentare të nevojshme, me mundësinë e një zgjatjeje prej 14 ditësh.
