Veliaj i është drejtuar zyrtarisht Kryetarit të Grupit Parlamentar Socialist, Taulant Balla, me kërkesën për inicimin e ngritjes së një komisioni hetimor parlamentar për të hetuar ndërhyrjet dhe kërcënimet që, sipas tij, i janë ushtruar nga Kryeministri Edi Rama përmes Ministrit të Drejtësisë. Ai kërkon të sqarohet nëse transferimi i tij nga Durrësi në Fier dhe kushte të caktuara paraburgimi janë përdorur si instrumente presioni për ta detyruar të pranojë organizimin e protestave në Tiranë dhe për t’u dorëzuar nga mandati që, thotë, i kanë besuar qytetarët e kryeqytetit.
Veliaj deklaron gatishmërinë për të dëshmuar nën betim para Kuvendit, sipas ligjit, dhe për t’u ballafaquar me Ministrin e Drejtësisë, Toni Gogu, duke paraqitur çdo provë që disponon. Ai kërkon gjithashtu që Kryeministri Edi Rama t’i nënshtrohet të njëjtit standard llogaridhënieje.
Kërkesën ia ka drejtuar shumicës parlamentare të partisë së tij, me argumentin se kontrolli kushtetues mbi qeverinë nuk mund të kushtëzohet nga përkatësia politike e atyre që duhet të japin llogari. Për më tepër, Veliaj thotë se ka vënë në dijeni Kongresin e Autoriteteve Lokale dhe Rajonale të Këshillit të Evropës dhe trupin diplomatik të akredituar në Shqipëri, si dhe ka kërkuar ruajtjen e menjëhershme të çdo prove dokumentare dhe audiovizive.
Ai sqaroi se nuk kërkon që Kuvendi t’i marrë si të mirëqena deklarimet e tij, por që t’i hetojë ato. Në mesazhin e tij theksohet se mandati i një kryetari bashkie buron nga vota e qytetarëve dhe se vota e qytetarëve nuk mund të bëhet objekt shantazhi politik, formulim që ai e përmend drejtpërdrejt në komunikimin e tij.
