Stuhia atlantike Charles pritet të godasë Portugalinë më 11 nëntor, me erëra që në zonat më të ekspozuara mund të arrijnë deri në 140 kilometra në orë. Autoritetet portugeze kanë shpallur paralajmërim të kuq në tetë distrikte, përfshirë Lisbonën, dhe kanë vendosur mbylljen e shkollave dhe shërbimeve publike joesenciale.
Sipas BBC Weather, moti i keq do të përhapet edhe në jugun e Francës dhe veriperëndimin e Italisë, para se reshjet dhe erërat e forta të përfshijnë pjesë të Ballkanit Perëndimor. Në Shqipëri, përkeqësimi më i ndjeshëm i motit pritet të ndodhë të premten, më 13 nëntor, kur veriu dhe veriperëndimi do të përballen me rrebeshe të forta, ndërsa në pjesën tjetër të vendit reshjet priten më të pakta.
Të enjten dhe të premten era mund të kalojë 80 kilometra në orë në det të hapur dhe të arrijë rreth 65 kilometra në orë pranë brigjeve jugperëndimore të Shqipërisë. Në Kroaci, përgjatë Adriatikut, parashikohen erëra me forcë stuhie, ndërsa në Bosnjë-Hercegovinë reshjet më intensive priten në Hercegovinë dhe në perëndim të vendit.
Në zonat malore, gjatë natës drejt së shtunës, shiu mund të kthehet në dëborë. Moti i paqëndrueshëm pritet të prekë gjithashtu Malin e Zi, Slloveninë, Kosovën, Maqedoninë e Veriut dhe pjesë të Greqisë. Lëvizja e masave të motit dhe intensiteti i erërave dhe reshjeve paralajmërojnë për ndikime të konsiderueshme në komunikacion dhe shërbime lokale, ndaj autoritetet dhe banorët në zonat e prekur janë këshilluar të ndjekin njoftimet zyrtare dhe masat paraprake.
Burim: Top Channel.
