Gjykata Europiane për të Drejtat e Njeriut në Strasburg vendosi në favor të Fredi Belerit, duke konstatuar se vazhdimi i paraburgimit të tij nga autoritetet shqiptare ishte joproporcional dhe nuk mbështetej në arsye të mjaftueshme. Sipas vendimit, arrestimi fillestar i Belerit ishte i justifikuar, por pas përfundimit të hetimeve më 19 korrik 2023 autoritetet shqiptare duhej të rivlerësonin nëse masa e arrestit në burg ishte ende e nevojshme.
Gjykata thekson se gjykatat shqiptare nuk morën në konsideratë në mënyrë të mjaftueshme faktin që hetimet ishin përfunduar dhe dosja ishte dërguar për gjykim. Nuk u paraqitën prova konkrete që tregonin se Beleri mund të ndërhynte në dëshmitë ose provat e çështjes. Po ashtu, autoritetet nuk shqyrtuan siç duhet lidhjet familjare dhe ekonomike të tij me Himarën, për të vlerësuar rrezikun e arratisjes ose ndikimit në proces. Gjykata vuri në dukje gjithashtu se nuk ishte konsideruar mundësia e zëvendësimit të paraburgimit me masa më të buta sigurie.
Si rrjedhojë, Strasburgu vendosi që Shqipëria t’i paguajë Fredi Belerit 450 euro për dëmin jopasuror dhe 5,000 euro për shpenzimet gjyqësore, në total 5,450 euro, pa përfshirë taksat e mundshme. Kërkesa e Belerit për kompensimin e të ardhurave të humbura gjatë periudhës kur nuk mundi të ushtronte detyrën e kryetarit të Bashkisë së Himarës u rrëzua nga Gjykata.
Fredi Beleri ishte arrestuar më 12 maj 2023 nën dyshimet për shitblerje votash. Në zgjedhjet vendore të atij viti u zgjodh kryetar i Bashkisë së Himarës, por nuk arriti të betohej dhe të merrte detyrën për shkak të paraburgimit. Më pas u dënua me dy vite burg për korrupsion aktiv në zgjedhje.
