Prokuroria italiane ka kërkuar 24 vite burg për 45-vjeçarin Moreno Violetto, i akuzuar për vrasjen e shqiptarit Fatos Cenaj, 58 vjeç, në Fontaniva, në provincën e Padovës. Kërkesa u paraqit nga prokurorja Maria D’Arpa në përfundim të pretencës në Gjykatën e Assizes në Padova. Violetto akuzohet për vrasje me dashje, të kryer me paramendim dhe për motive të ulëta.
Sipas akuzës, vrasja nuk rrjedh nga një konflikt familjar mes dy familjeve, por lidhet me një urrejtje të përgjithshme të të pandehurit ndaj fqinjëve të tij. Prokurorja argumentoi se objektivat e vërtetë të autorit dyshohet se ishin vajza dhe dhëndri i viktimës, ndërsa Fatos Cenaj u bë “viktima sakrifikuese më e lehtë dhe më e arritshme”, siç u shpreh ajo gjatë seancës.
Në mbështetje të kësaj teze, prokurorja përmendi një përgjim të kryer pas krimit, ku Violetto dyshohet t’i ketë thënë partneres së tij: “Kështu trëndafilat do të vuajnë edhe pak”, duke iu referuar, sipas akuzës, dhimbjes së vajzës së Cenajt dhe mbesave të tij pas humbjes së familjarit.
Ngjarja ndodhi më 8 qershor 2025. Fatos Cenaj, ish-punonjës i burgjeve në Shqipëri, u qëllua me armë zjarri në kokë teksa lëvizte me biçikletë në një rrugë në Fontaniva. Ai u dërgua në spital në gjendje të rëndë dhe ndërroi jetë pas tre ditësh.
Moreno Violetto ka pranuar pjesërisht autorësinë e krimit. Për shkak të rrethanave rënduese ai rrezikonte burgim të përjetshëm, por prokuroria kërkoi dënimin me 24 vite në burg, duke marrë në konsideratë edhe rrethanat lehtësuese.
