Një efektiv i Policisë Kombëtare në Spanjë ka humbur jetën dhe një tjetër ka mbetur i plagosur rëndë pas shpërthimit të një pajisjeje eksplozive në qytetin e Oviedos, në veri të vendit. Ngjarja ndodhi mëngjesin e kësaj të marte, kur autoritetet ishin thirrur për të ndërhyrë pas një konflikti të dhunshëm mes dy familjeve.
Gjatë përplasjes mes anëtarëve të familjeve, një grua e re u qëllua me armë zjarri nga një burrë; sipas autoriteteve, ajo ndodhet jashtë rrezikut për jetën. Me mbërritjen e forcave të rendit në vendngjarje, efektivët gjetën pranë hyrjes së një pallati një çantë shpine që përmbante një pajisje eksplozive. Sipas sindikatës së policisë JUPOL, shpërthimi ndodhi në momentin kur efektivët po largonin çantën nga ndërtesa me qëllim neutralizimin e rrezikut për banorët.
Efektivi që humbi jetën ishte pjesë e njësisë së qenve të Policisë Kombëtare. Polici tjetër, i plagosur shumë rëndë, i përkiste njësisë për çaktivizimin e eksplozivëve; ai ka humbur njërën këmbë si pasojë e shpërthimit dhe aktualisht ndodhet në gjendje shumë të rëndë shëndetësore. Autoritetet spanjolle kanë nisur hetimet për të sqaruar rrethanat e ngjarjes, duke vendosur në qendër të hetimeve konfliktin mes dy familjeve dhe vendosjen e pajisjes shpërthyese.
Ngjarja ka mobilizuar njësitë e policisë vendore dhe sindikatat përkatëse, ndërsa hetimet vijojnë për të përcaktuar përgjegjësit dhe motivet pas incidentit. Nuk janë dhënë të tjera detaje zyrtare mbi autorët e të shtënave, origjinën e çantës me eksploziv apo lidhjet e mundshme me konfliktin familjar. Lajmi u raportua nga mediume vendase dhe burime sindikalë, ndërsa autoritetet po mbledhin prova dhe po intervistojnë dëshmitarë për të ndërtuar një kronologji të plotë të ngjarjes.
