Një seri përgjimesh telefonike, së bashku me prova të tjera nga analiza e pamjeve filmike dhe e automjetit të marrë me qira, i ka mundësuar Policisë Kriminale të Tiranës të identifikojë e arrestojë mbrëmjen e djeshme autorin e dy grabitjeve të bankave në kryeqytet, Robert alias Albert Duka. Ai dyshohet se ka vjedhur afro 120 mijë euro nga dy filialet e “OTP Bank” dhe “Raiffeisen Bank”.
Hetimi tregon se pjesën më të madhe të kësaj shume Duka e ka shpenzuar në disa kazino të Tiranës. Një shumë prej 6 mijë eurosh, që ai ia ka dhënë dy miqve në Vlorë (3 mijë euro secilit), është sekuestruar nga policia pas kontrolleve atje. Dy personat janë marrë në pyetje dhe kanë deklaruar se paratë u ishin dhënë për të shlyer një borxh që Duka kishte ndaj tyre. Në kontrollin e banesës së Dukës u gjetën dhe u sekuestruan vetëm 2 200 euro.
Duka ka thënë gjatë komunikimit me punonjësit e policisë se paratë e grabitura, më 2 qershor 2026 dhe 2 nëntor 2026, i kishte shpenzuar duke luajtur në kazino. Për të verifikuar këto pretendime, policia dhe prokuroria i kanë kërkuar sot informacion katër kazinove të njohura në Tiranë, për të parë nëse ai figuron si klient i regjistruar dhe për t’u vënë në dispozicion dokumentacionin dhe pamjet filmike përkatëse. Ky pretendim nuk figuron në një deklarim me procesverbal, pasi avokati i mbrojtjes nuk e lejonte një deklarim të tillë.
Në hetime është marrë në pyetje edhe bashkëshortja e Dukës, e cila punon në një bankë të nivelit të dytë në Tiranë. Ajo ka deklaruar se shumën prej 120 mijë eurosh e kishin siguruar nga shitja e një apartamenti në zonën e stadiumit “Air Albania” dhe se nuk kishte dijeni për përfshirjen e bashkëshortit në grabitje. Pas deklarimeve ajo u la e lirë, ndërsa Duka u arrestua për veprën penale “Grabitje me armë të bankave”, që parashikon dënim nga 10 deri 20 vjet burgim.
Duka pritet të dalë nesër para Gjykatës së Tiranës për njohjen me masën e sigurisë. Hetimet vazhdojnë për të sqaruar nëse ai ka pasur bashkëpunëtorë; dyshohet se një person e ka larguar me automjet pas grabitjes së “OTP Bank”. Të dyja grabitjet paraqesin ngjashmëri në mënyrën e realizimit: autor i maskuar, nën kërcënimin e një arme që dukej si pistoletë, ka marrë para dhe është larguar me monopatinë elektrike, më pas duke e futur në një automjet të marrë me qira. Më herët Duka ka qëndruar në Greqi, ku dyshohet se ka kryer 26 grabitje me armë të bankave.
