Mbrëmjen e sotme në emisionin “Top Story” me Grida Dumën u diskutuan akuzat e reja të publikuara për ish-kreun e SHISH, Vlora Hyseni. Debati u shoqërua me përplasje midis Mentor Kikisë dhe Artan Hoxhës, që përqendruan diskursin te dyshimet për lidhje të paligjshme, roli i institucioneve të sigurisë dhe mënyra se si po trajtohet çështja nga drejtësia.
Mentor Kikia shprehu shqetësim për gjendjen e institucioneve shtetërore dhe kohën e publikimit të akuzave, duke thënë se ka kohë që “këtë fajtorin po duam t’a shohim me thes në kurriz” dhe shprehu dyshime pse çështja nuk u ngrit më herët. Ai kritikoi funksionimin e SHISH-it, duke deklaruar se “SHISH është bërë si kafene ordinerësh” dhe se çështjet nuk zbulohen rastësisht, duke theksuar se “provave janë se drejtoresha ishte nëpunëse e Agasit”. Në një fragment Kikia shtoi se “për vete jam qytetarisht i alarmuar kur e shoh shtetin tim të shtrirë për tokë të bërë llucë”.
Artan Hoxha kundërshtoi, duke e cilësuar situatën si pjesë të një loje më të madhe për të mbuluar çështje të tjera dhe duke vlerësuar se shërbimi i sigurisë është i dobësuar. Hoxha tha se “Zonja është derr me thes” dhe bëri dallimin midis vendimit të masës së sigurisë dhe përmbajtjes së dosjes, duke thënë “Ti po flet për një vendim masë sigurie, ne po flasim për dosjen. Nëse do ta dënosh e dënojmë”. Ai gjithashtu deklaroi se “SHIK është aq i mbaruar, shërbimi që do na mbronte është copë copë”.
Gjatë debatit u përsëritën akuza dhe kundërakuza mbi seriozitetin e provave dhe ndikimin e këtyre zhvillimeve në besueshmërinë e institucioneve. Të dy palët shprehën shqetësime për mënyrën se si po trajtohet çështja në opinion dhe nga autoritetet, pa arritur në konsensus mbi të vërtetën e akuzave. Top Channel.
