Gjykata e Fierit ka caktuar masën e sigurisë “Arrest në burg” për 52-vjeçarin Bledar Bakaj, i dyshuar për plagosjen e rëndë me dashje të 67-vjeçarit Enver Grëmi dhe për veprime në kundërshtim me vendimin e gjykatës. Vendimi u mor të hënën nga gjyqtarja Bora Shaholli, pas kërkesës së Prokurorisë së Fierit për masën më të rëndë.
Ngjarja që çoi në arrestimin e Bakajt u regjistrua në fshatin Suk të Roskovecit, ku ai dyshohet se tentoi sërish të marrë me forcë vajzën 34-vjeçare të familjes Grëmi. Përplasja me të atin e saj përfundoi në konflikt fizik, gjatë të cilit 67-vjeçari mbeti i plagosur në këmbë nga goditja me një mjet prerës, drapër, sipas raportimit të korrespondentit Neritan Trifoni.
Sipas dëshmisë së babait, ngjarjet e fundit janë pjesë e një historie që ka nisur disa muaj më parë. Bakaj i ishte afruar familjes me premtimin se do të ndihmonte për të gjetur një vend pune për vajzën, e cila vuan nga anemia dhe ka probleme shëndetësore. Më 26 maj, babë e bijë shkuan në Spitalin Rajonal të Fierit për një vizitë mjekësore; pas daljes nga spitali, 67-vjeçari pretendon se Bakaj e mori vajzën dhe e largoi me vete, duke i thënë të atin se do ta dërgonin me ambulancë drejt Tiranës. Familja nuk pati asnjë kontakt me të bijën për 45 ditë.
Pas rikthimit në banesë, vajza u ka treguar prindërve se ishte mbajtur kundër dëshirës dhe ishte dhunuar seksualisht. Më pas ajo ka kërkuar një urdhër mbrojtjeje në polici. Sipas babait, një natë përpara ngjarjes së dhunshme të regjistruar në Suk, Bakaj u kthye në banesë duke tentuar ta marrë sërish vajzën, ndërsa kundërshtimi i të atit çoi në përplasjen që rezultoi me plagosjen e tij.
Prokuroria e Fierit vazhdon hetimet për zbardhjen e plotë të rrethanave. Gjykata ka vendosur që Bledar Bakaj të qëndrojë në burg deri më 17 dhjetor 2026, në kuadër të masës së sigurisë së caktuar.
