Nëntë persona kanë humbur jetën pasi një avion privat u rrëzua në një zonë të banuar në Palm Beach County, Florida. Avioni i tipit Learjet 60 u rrëzua pranë Military Trail, midis Cresthaven Boulevard dhe 10th Avenue North, dhe pas përplasjes shpërtheu në flakë. Në bord ndodheshin nëntë persona; avioni ishte nisur nga Aeroporti Ndërkombëtar Austin-Bergstrom në Teksas me destinacion Bahamas.
Të dhënat e gjurmimit të fluturimit të cituara nga CNN tregojnë se avioni humbi rreth 27 mijë feet, ose mbi 8 mijë metra lartësi, brenda vetëm një minute, pak përpara se të ndërpritej gjurmimi. CNN raporton gjithashtu se në zonë kishte stuhi të shpërndara në momentin e aksidentit dhe se avioni kishte kaluar përmes një zone me stuhi më të fortë disa minuta përpara se të niste humbja e shpejtë të lartësisë. Nuk është ende e qartë nëse kushtet atmosferike kanë ndikuar në rrëzimin e tij.
Pamjet nga vendngjarja tregojnë avionin duke rënë me shpejtësi drejt tokës, përpara se të përplaset dhe të shpërthejë në flakë pranë një zone të banuar. Autoritetet lokale dhe ekipet e emergjencës mbërritën në vendngjarje për të menaxhuar situatën dhe pasojat, ndërsa hetimet lidhur me shkaqet e rrëzimit vazhdojnë.
CNN shkruan që presidenti amerikan Donald Trump kishte qenë në West Palm Beach më herët gjatë së dielës, por ishte larguar me Air Force One pak më shumë se një orë përpara rrëzimit të avionit. Autoritetet nuk kanë bërë ende të ditur shkaqet e aksidentit. Administrata Federale e Aviacionit (FAA) dhe Bordi Kombëtar i Sigurisë së Transportit (NTSB) po hetojnë ngjarjen dhe pritet të ofrojnë më shumë informacion ndërsa hetimet avancojnë.