Qytetarët e Bullgarisë votojnë këtë të diel në raundin e dytë të zgjedhjeve presidenciale, në një proces të shoqëruar nga shqetësime për sigurinë rajonale, sulmet me dronë ndaj transportit detar në Detin e Zi dhe vështirësitë ekonomike brenda vendit. Në garë janë presidentja në detyrë Iliana Jotova, që synon të bëhet gruaja e parë e zgjedhur drejtpërdrejt si presidente, dhe kandidati i opozitës Andrej Gjurov, ish-kryeministër i përkohshëm dhe përfaqësues i forcave pro-perëndimore.
Në raundin e parë më 25 tetor Jotova mori 34,76% të votave, ndërsa Gjurov 31,95%, por procesi u karakterizua nga një pjesëmarrje rekordisht e ulët, vetëm 23% sipas autoriteteve. Qendrat e votimit u hapën në 07:00 dhe pritet që rezultatet e para të sondazheve në dalje të dalin pas mbylljes në 20:00; rezultatet zyrtare priten të hënën.
Zgjedhjet zhvillohen në një klimë politike të polarizuar, me orientimin e politikës së jashtme dhe marrëdhëniet me Moskën si çështje kyçe. Jotova kandidon si e pavarur e mbështetur nga partia “Bullgaria Progresive” e kryeministrit Rumen Radev. Ajo pritet të ndjekë linjën e Radevit: mbështetje për integrimin evropian të Bullgarisë, por edhe për përmirësimin e marrëdhënieve me Rusinë dhe heqjen e sanksioneve ndaj saj. Jotova ka bërë thirrje për zgjidhje diplomatike të luftës në Ukrainë dhe gjatë një debati propozoi një marrëveshje që përfshinë të dyja palët, si dhe organizimin e një takimi sigurie me gjashtë vendet e Detit të Zi për një moratorium të armiqësive.
Andrej Gjurov paraqet një qasje më të orientuar drejt Perëndimit. Ekonomist me profesion, ish-zëvendësguvernator i Bankës Qendrore dhe ish-kryeministër i përkohshëm, ai është mbështetur nga forcat opozitare pro-evropiane. Gjatë drejtimit të qeverisë nënshkroi një marrëveshje bashkëpunimi në fushën e sigurisë me Ukrainën dhe ka kërkuar që Bullgaria të jetë aleate e besueshme e NATO-s dhe të marrë një qëndrim më të qartë ndaj agresionit rus. “Kur nuk ke një qëndrim dhe nuk je në tryezë, në fakt je në menu”, ka thënë ai.
Raundi i dytë shihet si testi i parë elektoral për “Bullgaria Progresive”; një fitore e Jotovës do të mbante presidencën në duart e shumicës qeverisëse, çka mund të ndikojë në mekanizmat e kontrollit dhe balancës, edhe pse kompetencat e presidentit ndryshojnë nga ato të kryeministrit. Sulmet me dronë në Detin e Zi dhe problemet ekonomike, si rritja e kostos së jetesës, mbeten çështje kryesore për votuesit. Rezultati do të përcaktojë jo vetëm presidentin e ardhshëm, por edhe drejtimin që Bullgaria do të ndjekë ndaj Bashkimit Evropian, NATO-s, Rusisë dhe luftës në Ukrainë.
