Ish-mundësja e WWE-së Elayna Black, e njohur më parë si Cora Jade, shpjegon arsyet që e çuan të hapte një llogari në OnlyFans pas largimit nga kompania. 25-vjeçarja ishte pjesë e NXT-it që prej 2021, por nuk arriti të ngjitej në rosterin kryesor dhe u largua nga WWE në maj të 2025. Pas një periudhe të shkurtër në TNA dhe pjesëmarrjes në gara të pavarura, Black vendosi të krijonte profil në OnlyFans, duke thënë se vendimi erdhi në një moment të vështirë të karrierës dhe kur iu dha mundësia për të fituar para në moshën 24-vjeçare.
Në një intervistë për kanalin e TNA-së në YouTube, ajo u shpreh se nuk kishte ëndërruar të bëhej modele në OnlyFans, por të bëhej mundëse profesioniste: “Unë nuk jam rritur duke ëndërruar të bëhesha modele në OnlyFans. Jam rritur duke ëndërruar të bëhesha mundëse. Fatkeqësisht, ëndrra ime m’u shua pa pasur asnjë kontroll mbi këtë situatë”. Black tha se hapja e llogarisë i solli edhe mundësi të tjera profesionale që më parë nuk i kishte konsideruar, pasi ishte përqendruar vetëm në karrierën në ring. Pavarësisht rikthimit të saj në TNA në janar, llogaria në OnlyFans mbetet aktive.
Gjatë intervistës, ajo foli edhe për paragjykimet ndaj krijueseve në OnlyFans, duke theksuar se një problem i madh është perceptimi që publimi i përmbajtjeve jep të tjerëve të drejtën të ndërhyjnë në jetën e tyre private ose t’i trajtojnë në mënyrë fyese.
Në dokumentarin e TNA-së, të publikuar më 29 tetor, Black rrëfeu një periudhë serioze shëndetësore: në janar 2023 ajo përjetoi një shtatzëni ektopike që nuk mund të vazhdonte, pati hemorragji të brendshme dhe iu nënshtrua një operacioni urgjent. Pas ndërhyrjes përjetoi depresion të rëndë, mungesë të oreksit dhe nevojën që nëna të jetonte me të për t’i ndihmuar. Në janar 2024, gjatë një ndeshjeje kundër Lyra Valkyria, pësoi dëmtim të rëndë në gju, me këputje të ligamentit ACL dhe MCL dhe të dy meniskëve. Përveç problemeve shëndetësore, ajo përballoi edhe ndarjen nga partneri dhe vdekjen e qenit të saj, ndërsa më pas u pushua nga puna, një periudhë që e bëri të ndjehej se po humbte gjithçka. Black tha se pas këtyre ngjarjeve kishte frikë të lidhej emocionalisht përsëri.
