Shqipëria parashikon për vitin 2027 buxhetin më të madh të propozuar deri tani, me shpenzime që do të kalojnë 976 miliardë lekë (mbi 10 miliardë euro) dhe të ardhura të parashikuara 907.9 miliardë lekë (rreth 9.4 miliardë euro). Diferenca prej rreth 68.183 miliardë lekësh pritet të mbulohet me financim të deficitit, i cili vendoset në 2.3% të Prodhimit të Brendshëm Bruto. Projektbuxheti u paraqit në Kuvend nga ministri i Financave, Petrit Malaj, dhe synon rritje të të ardhurave, më shumë investime publike dhe financim shtesë për pensionet, arsimin, shëndetësinë dhe sigurinë.
Qeveria parashikon një ulje të lehtë të raportit të borxhit publik ndaj PBB-së, në 52.4% për 2027 nga 52.9% në 2025, ndërsa ekonomia pritet të rritet me 4% në 2026. Në aspektin sektorial, mbrojtja sociale zë pjesën më të madhe të shpenzimeve me 279.7 miliardë lekë, ose rreth 30% të buxhetit të përgjithshëm. Brenda këtij zëri parashikohen dyfishimi i bonusit mujor për pensionistët me kosto vjetore 20 miliardë lekë dhe indeksimi i pensioneve në prill me 1.35 miliardë lekë.
Arsimi është parashikuar me 93.6 miliardë lekë, ndërsa shëndetësia me 87.2 miliardë lekë; të dyja fushat përfitojnë fonde shtesë për bursa studentësh, barna, pajisje mjekësore dhe infrastrukturë spitalore. Bujqësia merr 17.9 miliardë lekë në total, përfshirë 5.3 miliardë për skema direkte mbështetjeje, 400 milionë për ujitje e kullim dhe kompensim TVSH 10%, me 43,660 fermerë përfitues. Mbrojtja parashikohet me 76.7 miliardë lekë, ndërsa siguria do të marrë financim shtesë për pagat e punonjësve të Policisë së Shtetit.
Investimet publike për 2027 vlerësohen në 201.5 miliardë lekë (6.9% e PBB-së), kryesisht për infrastrukturë rrugore, porte, hekurudha dhe shërbime publike; mesatarisht investimet kapitale synohen të jenë 6.6% e PBB-së gjatë periudhës 2027–2029. Paralelisht u prezantua edhe një paketë fiskale për 2027 që sjell ndryshime në disa taksa kryesore.
Prezantimi shkaktoi përplasje politike: Partia Demokratike bojkotoi Konferencën e Kryetarëve, duke pretenduar se projektligji nuk iu ishte dhënë deputetëve në kohë; opozita kundërshtoi mungesën e njoftimit 48-orësh. Projektbuxheti do të vijojë shqyrtimin në komisionet parlamentare.
