Artisti Anri Sala sjell për herë të parë një reflektim të gjatë në gjuhën shqipe me librin “Zëri i tretë”, në bashkëbisedim me Alda Bardhylin. Botimi, i cili pritet të dalë në librari gjatë muajit nëntor, trajton artin bashkëkohor, historinë, lirinë dhe rëndësinë e mendimit kritik në shoqërinë shqiptare.
Dialogu mes Salës dhe Bardhylit zgjerohet përtej temave të artit dhe përfshin çështje të kujtesës, historisë dhe përgjegjësisë intelektuale. Nisur nga reflektimet mbi artin dhe përvoja e izolimit gjatë pandemisë, bashkëbisedimi shqyrton marrëdhënien mes individit dhe historisë, rëndësinë e komunikimit dhe nevojën për një hapësirë publike ku idetë të diskutohen në mënyrë kritike.
Anri Sala, i njohur ndërkombëtarisht për punën e tij që ndërthur imazhin, tingullin, kohën dhe kujtesën, e përdor artin si pikënisje për të shqyrtuar lidhjen mes përvojës personale dhe historisë kolektive. Në libër, arti pasqyron mënyra të ndryshme të përceptimit të realitetit dhe tregon sesi kultura ndërvepron me kuptimin e asaj që ndodh.
Një pjesë e veçantë e botimit i kushtohet historisë shqiptare dhe marrëdhënies së artit, mendimit dhe pushtetit gjatë periudhës së regjimit komunist, kur krijimtaria dhe shprehja e lirë u kufizuan nga kërkesat ideologjike. Në këtë kontekst, dialogu i lirë dhe mendimi kritik trajtohen si elementë të rëndësishëm të lirisë për të vënë në diskutim bindjet dhe të vërtetat e trashëguara.
Libri adreson edhe rolin e intelektualit sot, duke vënë në dukje se shpejtësia e informacionit dhe reagimet e menjëhershme shpesh lënë pak hapësirë për analizë të thelluar. Përmes bashkëbisedimit, shtrohet çështja e përgjegjësisë së mendimit të pavarur dhe e nevojës për pyetje që ndihmojnë në kuptimin e kompleksitetit shoqëror.
Titulli “Zëri i tretë” sugjeron krijimin e një hapësire të re përmes dialogut, dëgjimit dhe shkëmbimit të ideve. Botimi synon të trajtojë artin jo vetëm si përvojë estetike, por edhe si mënyrë të menduari dhe si mundësi për të hapur diskutime mbi të shkuarën, të tashmen dhe të ardhmen.
