Zgjedhjet parlamentare në Izrael kanë lënë të hapur rrugën për formimin e qeverisë së re, pasi as kampi i Benjamin Netanyahu dhe as opozita nuk kanë siguruar shumicën e nevojshme në parlament. Situata e ndërlikuar politike hap disa mundësi për daljen nga ngërçi, nga një qeveri e unitetit kombëtar deri te organizimi i zgjedhjeve të reja. Sipas analizës së BBC, katër skenarë kryesorë mund të përcaktojnë të ardhmen politike të vendit dhe mënyrën se si Netanyahu mund të qëndrojë në pushtet.
Një skenar parashikon krijimin e një qeverie të unitetit kombëtar, me një koalicion të gjerë mes partisë Likud të Netanyahut dhe forcave të opozitës. Një marrëveshje e tillë do të kërkonte kapërcimin e kundërshtive të forta politike, pasi një pjesë e opozitës ka zhvilluar fushatë me synimin për t’i dhënë fund qeverisjes së kryeministrit. Për Netanyahun, arritja e një qeverie të tillë mund të nënkuptonte rishikimin e aleancave me partitë e djathta dhe ato ultraortodokse për të siguruar mbështetjen parlamentare të nevojshme.
Skenari i dytë parashikon një marrëveshje të opozitës me partitë arabe për të siguruar shumicën parlamentare. Ky opsion ballafaqohet me pengesa politike për shkak të dallimeve ideologjike dhe qëndrimeve të kundërta të partive izraelite për bashkëpunimin me përfaqësuesit arabë. Një marrëveshje e tillë do të kërkonte negociata të vështira dhe mbështetje të mjaftueshme nga deputetët për të krijuar një shumicë alternative ndaj qeverisë së Netanyahut.
Skenari i tretë parashikon riorganizimin e kampit të djathtë, ku Netanyahu do përpiqej të zgjerojë mbështetjen përmes marrëveshjeve me parti dhe figura të tjera të së djathtës izraelite. Ky opsion varet nga gatishmëria e forcave të djathta për të bashkëpunuar me kryeministrin, ndërkohë që përplasjet politike dhe mosmarrëveshjet për çështje të rëndësishme, përfshirë shërbimin ushtarak për studentët ultraortodoksë, mund ta vështirësojnë arritjen e marrëveshjeve.
Nëse negociatat dështojnë dhe asnjëra palë nuk arrin të krijojë një qeveri me shumicë parlamentare, Izraeli mund të shkojë sërish në zgjedhje të parakohshme. Deri në formimin e një qeverie të re, Netanyahu mund të vazhdojë të qëndrojë në detyrë si kryeministër.
