Avokati Plarent Ndreca u shfaq në një lidhje live me emisionin “Breaking me Jetona Koçibellin” për të komentuar transferimin e Erion Veliajt në paraburgimin e Fierit. Ndreca deklaroi se nuk i është vënë në dispozicion asnjë akt mbi bazën e të cilit është kryer ky transferim.
“Fakt ky që tregon minimalisht mungesë transparence dhe maksimalisht një shkelje e rëndë të të drejtave të zotit Veliaj. Ai ka të gjithë të drejtën ligjore dhe kushtetuese për t’u njohur me aktin mbi bazë të cilit ai transferohet, shkaqet ku është bazuar Drejtoria e Përgjithshme e Burgjeve për të bërë këtë transferim, për sa kohë që Veliaj nuk ka shprehur asnjë shqetësim dhe konsensus për këtë lloj transferimi”, tha avokati.
Gjatë intervistës, Ndreca ishte në rrugë për në burgun e Fierit, pasi kishte marrë informacione që Veliaj ishte vendosur në një qeli izolimi. Ai shpjegoi se, sipas informacionit që kishte marrë, Veliaj ndodhej në një qeli pa dritare dhe pa kushte normale për të paraburgosurit, por theksoi se nuk mund ta konfirmonte këtë në mënyrë të pavarur dhe se po niste për të verifikuar situatën.
“Sipas informacioneve, rezulton se zoti Veliaj është vendosur në një qeli izolimi, pa dritare, pa kushte normale për të paraburgosurit, megjithatë nuk e konfirmoj dot dhe për këtë arsye jam nisur për të verifikuar këtë fakt. Do përpiqem ta takoj dhe të shikoj se çfarë kushtesh i kanë vënë në dispozicion autoritetet e burgut të Fierit”, u shpreh avokati Ndreca.
Ndreca njoftoi synimin për të takuar Veliajn dhe për të verifikuar kushtet e qëndrimit në institucionin e paraburgimit, si dhe për të parë dokumentacionin që ka shërbyer si bazë për transferimin, nënvizuar të drejtën ligjore dhe kushtetuese të të paraburgosurit për t’u njohur me aktet përkatëse. Top Channel
