Senati francez miratoi një projektligj që parashikon detyrimin e protestuesve për të paguar deri në 10 mijë euro për dëmet e shkaktuara gjatë demonstratave. Projektligji u miratua të mërkurën me 229 vota pro dhe 105 kundër, me mbështetjen e aleancës së partive të djathta dhe të qendrës, të cilat kanë shumicën në Senat.
Legjislacioni do të duhet të shqyrtohet dhe të miratohet edhe nga Asambleja Kombëtare, ku forcat politike janë më të përçara, përpara se të hyjë në fuqi. Nisma u propozua fillimisht pas trazirave që shpërthyen në maj, pas fitores së Paris Saint-Germain ndaj Arsenalit në finalen e Ligës së Kampionëve, por mori një rëndësi të re pas protestave të 17 tetorit kundër pabarazisë ekonomike dhe rritjes së çmimeve, të cilat u shoqëruan me përplasje të dhunshme, dëmtime pronash dhe grabitje biznesesh.
Projektligji parashikon që përgjegjësia financiare të mos kufizohet domosdoshmërisht vetëm te personat që kanë shkaktuar drejtpërdrejt dëme. Edhe individët që provohet se kanë marrë pjesë me vetëdije në grupe të krijuara për të kryer akte vandalizmi mund të detyrohen të paguajnë dëmshpërblime. Një dispozitë tjetër e debatueshme parashikon mundësinë e sekuestrimit të përfitimeve sociale dhe ndihmës për strehim për të mbuluar dëmet e shkaktuara, masë që ka shkaktuar kundërshtime nga deputetët e majtë dhe organizatat e të drejtave të njeriut.
Amnesty International paralajmëroi se dispozitat e propozuara mund t’i shtyjnë familjet tashmë të margjinalizuara drejt një varfërie edhe më të thellë. Artikulli përmend gjithashtu se Franca nuk është i vetmi vend europian që po ndërmerr masa më të ashpra ndaj dhunës në protesta: edhe Italia ka miratuar dispozita të reja sigurie që parashikojnë dënime nga 4 deri në 12 vite burg për organizimin e grupeve të përfshira në demonstrata të dhunshme.
