Vora arriti një fitore të rëndësishme ndaj Vllaznisë, duke fituar 2-1 në një ndeshje të luftuar dhe me emocione deri në fund. Skuadra vendase shënoi nga një herë në secilën pjesë, ndërsa shkodranët arritën të ngushtonin diferencën vetëm në fund, pa kohë për t’u kthyer.
Ndeshja u zhbllokua në minutën e 16-të kur Kashari realizoi një gol të bukur nga distanca, duke kaluar Vorën në avantazh. Pas këtij goli, vendasit vazhduan të paraqiteshin rrezikshëm në sulm dhe krijuan disa mundësi për të dyfishuar shifrat, por mungoi konkretizimi. Vllaznia u përpoq të reagonte dhe lojtarët si Balaj e Murataj krijuan raste të mira përpara portës së Vorës, por portieri Harizaj u tregua i vëmendshëm dhe neutralizoi disa përpjekje vendimtare.
Edhe në pjesën e dytë shkodranët patën mundësi për të barazuar, por nuk arritën të dërgonin topin në rrjetë në momente kyçe. Kur Vllaznia po kërkonte golin e barazimit, Vora goditi sërish: në minutën e 85-të Frroku realizoi një aksion të shkëlqyer dhe shërbeu për Dakën, i cili shënoi për 2-0, duke i dhënë vendasve një avantazh të rëndësishëm në fundin e takimit.
Megjithatë, Vllaznia nuk u dorëzua dhe në minutën e 89-të fitoi një penallti pas ndërhyrjes së Shehit. Nga pika e bardhë u tregua i saktë Balaj, i cili ngushtoi shifrat në 2-1 dhe rihapi për pak çaste sfidën. Në minutat e mbetura, megjithë përpjekjet e shkodranëve, nuk erdhi gol i barazimit dhe takimi përfundoi me fitoren e Vorës.
Rezultati përfundimtar: Vora 2-1 Vllaznia. Golat: 16’ Kashari, 85’ Daka / 89’ (P) Balaj.
