Një tregtar 35-vjeçar me shtetësi kineze u denoncua në Itali pasi vendosi në raftet e dyqanit tabela me mesazhe kërcënuese ndaj personave që mund të tentonin të vidhnin mallrat. Ngjarja ndodhi në Pomigliano d’Arco, pranë Napolit, ku pronari i një dyqani artikujsh për shtëpinë u referua nga policia bashkiake për dyshime mbi veprën penale të kërcënimit të rënduar.
Sipas mediave italiane, sinjalizimet e disa qytetarëve që kishin vënë re mesazhet frikësuese brenda biznesit konkretizuan kontrollin e autoriteteve. Gjatë kontrollit, efektivët zbuluan disa fletë të vendosura mes rafteve, në vende të dukshme për klientët, ku shkruhej: “Kushdo që vjedh, e gjithë familja e tij do të vritet”. Pas konstatimit të mesazheve, policia identifikoi pronarin e biznesit dhe e referoi çështjen në Prokurorinë e Nolas.
Tabelat u sekuestruan si prova materiale dhe dokumentacioni i mbledhur iu përcoll autoriteteve gjyqësore për vlerësim të mëtejshëm. Raportimet thonë se tregtari dyshohet se mund t’i ketë vendosur mesazhet me synimin e frenimit të vjedhjeve të përsëritura në dyqan, por motivet e tij nuk janë konfirmuar zyrtarisht.
Hetimet për rastin vijojnë nga autoritetet italiane, ndërsa ndaj pronarit rëndon dyshimi për kërcënim të rënduar.
