Prokuroria e Posaçme kundër Korrupsionit dhe Krimit të Organizuar (SPAK) përfundoi hetimet dhe dërgoi në Gjykatën e Posaçme të Shkallës së Parë kërkesën për gjykimin e 17 të pandehurve, të akuzuar për trafik ndërkombëtar të lëndëve narkotike dhe përfshirje në grup të strukturuar kriminal. Nga hetimet rezultoi se komunikimet në platformën e enkriptuar SkyECC shërbyen për koordinimin e aktiviteteve kriminale; këto mesazhe janë administruar nga autoritetet franceze në kuadër të bashkëpunimit ndërkombëtar.
SPAK dokumentoi tre episode të trafikut të drogës nga Shqipëria dhe Ekuadori drejt vendeve të Evropës dhe Turqisë, ku në total u sekuestruan rreth 2.43 tonë lëndë narkotike. Episodi i parë, më 3 nëntor 2020, në Mal të Zi u sekuestruan 1,722 kg marijuanë, dërguar nga Shqipëria me destinacion përfundimtar Gjermaninë. Episodi i dytë, më 23 nëntor 2020, në Holandë u sekuestruan 475 kg kokainë, dërguar nga Ekuadori në portin Vlissingen. Episodi i tretë, më 26 janar 2021, në Turqi u sekuestruan rreth 236 kg marijuanë, dërguar nga Shqipëria me destinacion Turqinë.
SPAK konkludon se Emiljan Burba, Rexhep Rraja dhe Ervis Shuli kishin rolin e drejtuesve dhe financuesve të aktivitetit kriminal, ndërsa të tjerët figurojnë si pjesëmarrës. Nga të pandehurit e përmendur janë: Bujar Sefa (alias Xaka, alias Lala), i akuzuar për trafikim të përsëritur të lëndëve narkotike; Marvin Bushati, i akuzuar për trafikim dhe për “mbajtje pa leje dhe prodhim të armëve, armëve shpërthyese dhe të municionit” të sekuestruara në banesë gjatë ekzekutimit të masës së sigurimit personal më datë 10.12.2025; si dhe Jani Çavo, Përparim Rraja, Gazmir Rraja, Sokol Qaja, Aldo Gjini (alias Iamandi), Bledar (alias Blerti) Cafi, Endrit (alias Indrit) Dokle, Zamir Aliaj (alias Çoku), Islam Sefa (alias Xaka), Hajdar Sefa (alias Xaka, alias Lala), Vidjan Baroka dhe Agim Nina (alias Lorenc Selmani), të akuzuar për trafikim dhe pjesëmarrje në grup të strukturuar kriminal.
Për identifikimin e bashkëpunëtorëve dhe vijimin e hetimit pasuror, aktet e procedimit nr. 9 të vitit 2024 janë ndarë dhe numeruar si procedim i ri nr. 9/1 i vitit 2026, me vijim të hetimeve për veprat penale të ngritura. Hetimet u kryen në bashkëpunim me autoritetet e drejtësisë të Gjermanisë, Francës, Holandës, Belgjikës, Malit të Zi, Turqisë, Ekuadorit, si dhe me Eurojust, Europol, strukturat e hetimit të Policisë së Shtetit dhe Byronë Kombëtare të Hetimit.
