Komisioni i Ekonomisë nisi mbledhjen me debate, të cilat u përqendruan kryesisht tek protestat në rrugë dhe qëndrimet e opozitës dhe mazhorancës ndaj tyre. Nga radhët e opozitës mori pjesë deputetja Ledina Aliolli, e cila i kushtoi fjalën e saj situatës së protestave dhe theksoi se Partia Demokratike do të qëndrojë pranë studentëve në sheshe. Aliolli cilësoi se mbledhja nuk mund të zhvilloonte rend normal pune, duke nxjerrë në pah praninë e të rinjve që protestojnë jashtë sallës dhe, sipas saj, përdorimin e dhunës ndaj tyre. Ajo përmendi rastin e një të riu nga Elbasani, Erjonit, i cili, sipas Aliollit, po lufton për jetën e tij dhe rrezikon të humbasë shikimin, dhe akuzoi forcat që po ushtrojnë dhunë “në mënyrë shtazarake” ndaj protestuesve, studentëve dhe qytetarëve në shesh. Pas fjalës së saj, Aliolli u largua nga mbledhja.
Përfaqësuesi i Partisë Socialiste, Erion Braçe, iu përgjigj qëndrimit të opozitës duke theksuar se PS mbetet e hapur për dialog. Ai vuri në dukje se protesta në Tiranë po vazhdojnë prej më shumë se 15 ditësh, por argumentoi se dallimi kyç i këtyre protestave është prania e akteve të dhunshme, të cilat, sipas tij, kanë tejkaluar ligjin, rendin publik dhe Kushtetutën. Braçe shprehu keqardhje për çdo të lënduar nga aktet e dhunës, duke përfshirë edhe efektivët e policisë, po ashtu edhe për çdo qytetar të dëmtuar në protesta. Ai nënvizoi se termin “student” nuk e përcakton dallimi, por aktet e dhunës dhe se PS ka vëmendjen e duhur për kërkesat e studentëve, përjashtuar ato raste kur individë ushqejnë dhunë dhe pengojnë krijimin e një dialogu të qartë në protestë. Braçe shtoi se secila forcë politike po mban qëndrim të veçantë: përfaqësuesit e PD kanë zgjedhur një qëndrim, ndërsa PS ka zgjedhur një tjetër.
