Incidente të rënda shpërthyen mbrëmjen e së hënës në Bilbao pas anulimit të një aktiviteti të ekstremit të djathtë të Vito Quiles. Trazirat përfshinë disa zona të qytetit, ku grupe personash të maskuar ngritën barrikada, dogjën makina dhe kazanë mbeturinash, dhe u përleshën me forcat e rendit. Zjarret e akte vandalizmi u shfaqën edhe pranë kullës Iberdrola dhe në pjesë të tjera të qytetit, ndërsa zjarrfikësit ndërhynë për të shuar vatrat.
Sipas mediave spanjolle, rreth 20 persona u arrestuan, shumë prej tyre të mitur. Numri i arrestimeve u rrit gradualisht gjatë mbrëmjes — nga nëntë në orën 20:15, në 14 në orën 21:00, për të arritur më pas rreth 20. Policia baske, Ertzaintza, vijoi operacionet për identifikimin dhe arrestimin e pjesëmarrësve. Autoritetet thanë se disa grupe ishin drejtuar drejt stacionit të policisë në Deusto, ku hodhën gurë dhe i vunë flakën një motoçiklete të policisë bashkiake, e cila ishte përdorur si pengesë rrugore. Në disa raste raportohet edhe plaçkitje e dyqaneve.
Tensionet u përshkallëzuan rreth orës 18:30 në zonën e Deustos, pranë universitetit, ku gjatë ditës ishin zhvilluar protesta kundër vizitës së Quiles. Universiteti i Deustos suspendoi aktivitetet akademike dhe mbylli ambientet pas rekomandimeve të policisë; institucion i sqaroi se nuk kishte lidhje me organizimin e aktivitetit dhe dënoi çdo veprim që nxit dhunën. Vendimi nxiti debate politike.
Menaxhimi i operacionit policor shkaktoi reagime, pasi një pjesë e forcave të dislokuara paraprakisht ishte tërhequr nga disa zona pak para shpërthimit të incidenteve më të rënda. Sindikata e policisë Erne e konsideroi situatën shqetësuese, kërkoi shpjegime nga drejtuesit politikë dhe kritikoi mungesën e informacionit për efektivët në terren.
Autoritetet vendase dhe përfaqësues politikë dënuan dhunën. Presidenti i qeverisë autonome të Vendit Bask, Imanol Pradales, dhe kryetari i bashkisë së Bilbaos, Juan María Aburto, reagonin ashpër; Aburto i cilësoi pjesëmarrësit “fashistë”. Ministri i Sigurisë, Bingen Thupiria, tha se pamjet i kujtonin periudha të errëta të së kaluarës.
Vito Quiles njoftoi anulimin e aktivitetit pasi, sipas tij, ishte paralajmëruar nga policia për rrezik të lartë. Ai akuzoi kundërshtarët pa paraqitur prova dhe njoftoi se do të rikthehej më 29 nëntor. Quiles, gazetar dhe aktivist i njohur në qarqet e së djathtës, është përfshirë në polemika dhe po përballet me një çështje gjyqësore në Madrid për një incident të vitit 2024; procesi vazhdon. Autoritetet vijojnë hetimet për personat e përfshirë dhe menaxhimin e operacionit policor.
