Këngëtarja nga Kosova Rinesa Qeriqi, e njohur me emrin e artit Rinesancë, u nda nga jeta në moshën 25-vjeçare pas një beteje të gjatë me tumor në tru. Lajmin e bëri të ditur motra e saj, Drenisa, përmes një postimi në rrjetet sociale, ku shprehu dhimbjen e familjes: “Mëngjesi i sotëm na erdhi pa ty, Rina jonë. Do të mbetesh gjithmonë në zemrat tona, deri në përjetësi. Të duam fort, unë, mami, babi, Buna e Froni. Pusho e qetë, shpirt i bardhë.”
Reagime publike për humbjen e saj vunë në pah lidhjet e Rinesës me skenën muzikore. Këngëtari Alban Skënderaj e kujtoi duke zbuluar se ajo kishte interpretuar personazhin e Leas në një prej videoklipeve të tij dhe i uroi: “Prehu në paqe, Rinesa. Edhe pse tepër shkurt, e jetove jetën me guxim, si një ‘Lea’ e vërtetë.” Mesazhe ngushëllimi shprehën edhe artiste të tjera, përfshirë Dafina Zeqiri, Fifi dhe Tayna.
Rinesa ishte diagnostikuar me tumor në tru në vitin 2025. Gjatë periudhës së sëmundjes ajo i nënshtrohej ndërhyrjeve kirurgjikale dhe trajtimeve me rrezatim. Me përkeqësimin e gjendjes së saj, familjarët kërkuan ndihmë financiare për të përballuar shpenzimet e trajtimit.
E lindur në Prishtinë, Rinesa jetonte dhe krijonte në Kanada. Ajo ishte dalluar për stilin e saj të veçantë muzikor dhe kishte tërhequr vëmendjen e publikut përmes interpretimeve në rep dhe teksteve personale, që pasqyronin identitetin dhe përjetimet e saj artistike. Përmes punës së saj muzikore ajo kishte krijuar lidhje me publikun dhe kolegët në skenën muzikore, siç dëshmohen edhe reagimet pas vdekjes së saj.
Lajmi mbi ndarjen e Rinesës u shpërnda në rrjetet sociale dhe u përcoll me edhe me kujtime dhe ngushëllime nga bashkëpunëtorë dhe figura të njohura të muzikës.
