E ftuar në emisionin “Live me Luizin”, Ronela Hajati komentoi situatën e fundit në Shqipëri dhe çfarë do të bënte po të ishte kryeministre. Ajo deklaroi se do të rriste pensionet dhe pagat, duke sjellë si shembull nënën e saj, mësuese që sipas saj nuk fiton dot “as 200 mijë lekë”: “Do rrisja pensionet. Ajo nëna ime ka qenë mësuese e mrekullueshme, ka edukuar breza e breza dhe nuk merr as 200 mijë lekë, turp e faqja e zezë. Do rrisja rrogat.”
Këngëtarja theksoi se nuk merret me politikë dhe se politika “të ndyn edhe më i ndershmi të jesh”, duke shtuar se sipas saj politika në vend është më e ndyrë se sa paraqitet në libra. Ajo shprehu shqetësim për shpopullimin, duke vënë në dukje se shumë shqiptarë janë larguar: “Po të ishim 8 milionë këtu në Shqipëri, shumë gjëra ndoshta nuk do ndodhnin. Mund të zëvendësonim personat që na kanë bërë keq.” Ronela theksoi dashurinë për vendin dhe e përshkroi temën si shumë delikate: “Kjo është një temë shumë delikate, që siç thuhet rëndomë ‘ha debat’.”
Artistja u shpreh se nuk i intereson se cila parti vjen, duke deklaruar se nuk është as e majtë as e djathtë, dhe pranoi se nuk e dinte emrin e presidentit. Ajo përmendi profesionin e saj si këngëtare dhe lidhjen me publikun: “Kam një lloj profesioni që këngët e mia mi dëgjon populli, e kjo më intereson.” Ronela vuri në dukje hendekin ekonomik mes të pasurve dhe atyre në nevojë, duke argumentuar se nëse ky hendek do të ishte më i vogël, pak njerëz do të largoheshin nga vendi.
Në lidhje me ngjarjet e fundit, kur u pyet nëse i referohej atyre, ajo u përgjigj se “është situatë më delikate.” Përfundimisht, ajo tha se qëndron “me popullin” dhe shprehu shqetësimin për vështirësitë e përditshme, duke nënvizuar se më shpesh njerëzit thonë “nuk ia del” sesa “ia del”.
