Biznesmeni shqiptar Ermal Beqiri do të vazhdojë të qëndrojë në paraburgim në Francë, pasi Gjykata e Apelit në Amiens ka refuzuar kërkesën e tij për lirim. Vendimi, marrë të premten më 23 tetor, u bë pasi Beqiri u paraqit sërish përpara gjykatës, vetëm tri ditë pas shqyrtimit të mëparshëm të kërkesës për lirimin e tij, njofton gazeta Le Courrier Picard.
Beqiri kërkohet nga autoritetet shqiptare në kuadër të një hetimi për tenderat publikë, dhe drejtësia franceze po shqyrton kërkesën për ekstradimin e tij drejt Shqipërisë. Gjyqtarët vendosën të mos e pranojnë kërkesën për lirimin, duke bërë që biznesmeni të mbetet në qeli deri në vijimin e procedurave gjyqësore për një ekstradim të mundshëm. Po të njëjtën ditë, Dhoma e Hetimit në Amiens shqyrtoi edhe çështjen në themel të kërkesës për ekstradim të paraqitur nga autoritetet shqiptare.
Ermal Beqiri është pronar i kështjellës në Berneuil-en-Bray, në departamentin francez të Oise. Ai u arrestua në fund të korrikut në Méaulte, pranë Albertit. Arrestimi erdhi pas një incidenti ku biznesmeni kishte fluturuar me avionin e tij mbi centralin bërthamor të Penly, në rajonin e Seine-Maritime. Emri i tij është përfshirë në një hetim të drejtësisë shqiptare lidhur me kontratat publike, çka ka çuar në kërkesën e autoriteteve shqiptare për ekstradim.
Vendimi përfundimtar mbi ekstradimin mbetet në duart e institucioneve gjyqësore franceze, ndërsa procedurat ligjore vijojnë. Për momentin, Beqiri do të qëndrojë në paraburgim deri në një vendim të mëtejshëm të autoriteteve përkatëse.
