Milani reagoi duke mbrojtur portierin Mike Maignan pas sulmeve raciste në rrjetet sociale që pasuan kartonin e kuq në humbjen 3-0 ndaj Bournemouth. Klubi italian dënoi ashpër sjelljet raciste dhe diskriminuese, duke theksuar se “racizmi dhe diskriminimi nuk kanë vend në futboll”, dhe shprehu mbështetjen e plotë për portierin.
Maignan u ndëshkua me karton të kuq pas një kontakti me një kundërshtar në ndeshjen në Angli, gjatë së cilës i vendosi duart në fytyrë. Pas episodit, portieri dha versionin e tij përmes Instagramit, duke e përshkruar veprimin si një përpjekje për të fituar hapësirë. Megjithatë, pas ndeshjes ai u bë objekt i sulmeve të papranueshme raciste në mediat sociale.
Në deklaratën zyrtare, AC Milan dënoi gjuhën raciste të drejtuar ndaj Maignan dhe theksoi se portieri ka mbështetjen e plotë të “familjes kuqezi”. Klubi bëri thirrje që zemërimi për rezultatet sportive të mos kthehet në sulme personale apo raciste, duke rikujtuar se respekti, përfshirja dhe barazia duhet të mbeten parime themelore të futbollit, edhe në momentet më të vështira.
Në reagim përsëritej: “Pas ndeshjes së djeshme kundër Bournemouth, Mike Maignan ishte shënjestër e abuzimit serioz dhe të papranueshëm racist në mediat sociale. AC Milan dënon me forcë të gjitha format e racizmit dhe diskriminimit, sjellje të papranueshme që nuk kanë vend as në fushë dhe as jashtë saj.” Klubi gjithashtu theksoi nevojën për unitet ndër tifozët dhe komunitetin e futbollit italian: “Ne duhet të mbetemi të bashkuar, si tifozë të AC Milan dhe si pjesë e futbollit italian. E vetmja mënyrë për ta rikthyer futbollin italian aty ku meriton të jetë është të qëndrojmë së bashku dhe të japim më të mirën tonë, si individualisht ashtu edhe kolektivisht.”
Në përfundim, Milani kujtoi se dëshira për të fituar nuk duhet të vijë në kurriz të dinjitetit dhe respektit të ndërsjellë, duke përmbledhur: “Ne të gjithë duam të fitojmë, por duhet ta bëjmë në mënyrën e duhur, me dinjitet, respekt të ndërsjellë dhe klas.”
