Adri Mehmeti, 17 vjeç, po shënon një ngritje të shpejtë në futbollin amerikan si mesfushor i New York Red Bulls dhe është bërë titullar i skuadrës së tij. Në një intervistë për CNN Sports, ai thotë se gjithçka ka ndodhur më shpejt nga sa e kishte imagjinuar: “Një vit isha te skuadra e dytë dhe vitin tjetër te ekipi i parë. Në fillim mendoja: ‘Uau, kjo është e pabesueshme’”, duke falënderuar trajnerët dhe stafin për besimin ndaj tij pavarësisht moshës.
Historia e tij me futbollin nis herët; ai kujton se filloi të godiste topin me të atin që kur ishte rreth dy vjeç. “Babai im ka qenë ndikimi më i madh, si në fushë, ashtu edhe jashtë saj. Kemi luajtur me top çdo ditë në oborr dhe kjo më bëri të dashurohesha me futbollin”, thotë Mehmeti. Prindërit e tij janë me origjinë shqiptare, ndërsa i ati ka luajtur futboll në rininë e tij dhe ka përfaqësuar Shqipërinë në nivelet e moshave. Mehmeti më parë ka luajtur edhe me përfaqësueset e moshave të Shqipërisë, por më vonë u grumbullua nga trajneri Mauricio Pochettino me kombëtaren e parë të Shteteve të Bashkuara.
Mehmeti iu bashkua akademisë së New York Red Bulls në 2019, rreth moshës 10-vjeçare. Përparimi i tij ishte i shpejtë: debutoi me ekipin e parë në shkurt në moshën 16-vjeçare dhe në prill shënoi golin e parë në Major League Soccer. Në shtator debutoi edhe me kombëtaren e parë të SHBA-së në fitore 4-1 ndaj Perusë, duke u aktivizuar në minutën e 88-të në vend të Tyler Adams. Ai përshkruan përvojën me përfaqësuesen si intensive dhe të nivelit të lartë: “Cilësia ishte shumë e lartë… Ishte një përvojë e shkëlqyer”.
Pavarësisht suksesit sportiv, Mehmeti vazhdon shkollën me mësime në distancë dhe ende nuk ka patentë, duke shkuar në stërvitje me makinën e nënës së tij. Në kohën e lirë luan videolojëra dhe golf me shokët e skuadrës, ndërsa analizon pamje të lojës për të përmirësuar performancën. Ai përmend si modele lojtarët Rodri, Pedri dhe Elliot Anderson. Sipas raportimeve, interesi ka ardhur edhe nga klube europiane, por për momentin ai mbetet i përqendruar te New York Red Bulls dhe po përgatitet për përballjen e ardhshme me Inter Miami të Lionel Messit.
