Mbretëria e Bashkuar do të akordojë deri në 5 milionë paund për të mbështetur vendet e Ballkanit Perëndimor në luftën kundër emigracionit të paligjshëm dhe krimit të organizuar. Paketa e re e ndihmës, që përfshin edhe Shqipërinë, u njoftua nga ministri i Shtetit për Evropën në MB, Lord Wood of Anfield, në Samitin e Procesit të Berlinit në Mal të Zi.
Financimi synon të mbështesë institucionet e vendeve të rajonit përmes trajnimeve, ekspertizës britanike dhe forcimit të shkëmbimit të informacionit. Qëllimi është goditja e krimit të organizuar dhe parandalimi i shfrytëzimit të emigrantëve nga rrjetet kriminale.
Nga Budva, ministri britanik tha se bandat kriminale kanë shfrytëzuar prej kohësh rajonin, duke përfituar nga njerëzit e pambrojtur dhe duke rrezikuar jetët e tyre. Sipas tij, financimi i ri do të forcojë bashkëpunimin me partnerët ndërkombëtarë dhe sigurinë e Evropës.
Sipas njoftimit për media, pajisjet dhe trajnimet e financuara nga Londra kanë ndihmuar autoritetet e Ballkanit Perëndimor të kryejnë më shumë se 100 ndërhyrje ndaj emigrantëve që prej qershorit 2026, si dhe të godasin disa banda kriminale. Ndihma e re do të vijojë të mbështesë këtë punë operacionale dhe ndërtimin e kapaciteteve lokale.
Programi do të mbështesë punën e Task-Forcës së Përbashkët të EMigracionit (JMTF), një nismë që bashkon specialistë nga vende të ndryshme për të zbuluar, parandaluar dhe ndërprerë aktivitetet e paligjshme të emigracionit. Task-forca ka zhvilluar operacione në Shqipëri, Kosovë, Mal të Zi dhe Maqedoninë e Veriut.
Qeveria britanike njoftoi se do të vazhdojë bashkëpunimin me partnerët ndërkombëtarë për të goditur rrjetet e trafikimit dhe për të penguar organizatorët e emigracionit të paligjshëm përpara se të vënë në rrezik më shumë persona.
