Senatorja amerikane Elissa Slotkin reagoi për situatën e protestave në Shqipëri, duke i bërë thirrje qeverisë të mbrojë qytetarët nga përdorimi i tepruar i forcës policore, të luftojë korrupsionin dhe t’u përgjigjet shqetësimeve të tyre. Në një mesazh të publikuar në rrjetin social X, Slotkin shprehu shqetësim për përshkallëzimin e dhunës dhe theksoi të drejtën e qytetarëve për të protestuar në mënyrë paqësore dhe për t’u kërkuar llogari përfaqësuesve të zgjedhur.
Senatorja bëri të ditur se gjatë ditëve të fundit pati telefonata të shumta nga qytetarë të shqetësuar nga shteti i Michiganit lidhur me zhvillimet në Shqipëri dhe vende të tjera evropiane. Ajo theksoi edhe detyrimet e qeverisë shqiptare për të respektuar shtetin e së drejtës, për të garantuar mbrojtjen e protestuesve nga abuzimi i forcës policore, si dhe për të trajtuar problemet e korrupsionit dhe shqetësimet që vijnë nga qytetarët.
Në reagimin e saj Slotkin ripërsëriti se “Populli shqiptar ka të drejtë të protestojë në mënyrë paqësore dhe t’u kërkojë llogari zyrtarëve të zgjedhur prej tij”, duke theksuar si nevojë edhe veprime konkrete nga autoritetet për të mbrojtur këtë të drejtë dhe për të siguruar zbatimin e ligjit në mënyrë të drejtë. Ajo nënvizoi se mbrojtja e protestuesve nga përdorimi i tepruar i forcës është pjesë e detyrimeve të qeverisë, si dhe se lufta kundër korrupsionit dhe adresimi i shqetësimeve publike janë elemente thelbësore për stabilitetin dhe besimin qytetar.
Si përfundim të mesazhit të saj, Slotkin u bëri thirrje të gjitha palëve të angazhohen për uljen e tensioneve dhe për gjetjen e një zgjidhjeje paqësore. Ajo deklaroi: “U bëj thirrje të dyja palëve të bëjnë gjithçka që munden për të ulur tensionet dhe për të gjetur një rrugë paqësore për të ecur përpara”, duke përsëritur nevojën për dialog dhe deeskalim të menjëhershëm.
