Unioni Turistik Shqiptar reagoi për protestat e studentëve dhe të rinjve në Tiranë dhe qytete të tjera, duke bërë thirrje për ruajtjen e paqes sociale dhe hapjen e dialogut mes qeverisë dhe studentëve. Në deklaratë organizata shpreh shqetësim për përplasjet dhe tensionet sociale që kanë sjellë lëndime për protestuesit dhe forcat e rendit, dhe paralajmëron se dhuna dhe pasiguria rrezikojnë imazhin e Shqipërisë, besimin e turistëve dhe marrëdhëniet me operatorët e huaj.
Unioni thekson se e drejta për të protestuar është një vlerë themelore demokratike, por kërkon që pjesëmarrësit të ruajnë karakterin paqësor të demonstratave, të distancohen nga veprimet që cenojnë sigurinë e qytetarëve dhe të mos dëmtojnë bizneset private. Organiza thekson rëndësinë e mbrojtjes së investimeve në sektorin turistik — të kryera nga sipërmarrës të ndershëm dhe nga familje që kanë investuar kursimet e emigrantëve — dhe nënvizon se këto investime nuk i përkasin as qeverisë e as forcave politike.
Unioni thotë se shqetësimet e studentëve janë edhe të sektorit turistik, pasi industria ka nevojë për të rinj të kualifikuar që të punojnë në vend, të mos detyrohen të emigrojnë dhe të kontribuojnë në të ardhurat e dhjetëra mijëra familjeve. Organizata vë në dukje se pamjet e dhunës dhe pasigurisë, të përhapura në media ndërkombëtare, mund të dëmtojnë partneritetet e ndërtuara me operatorët e huaj, që e kanë vlerësuar Shqipërinë për mikpritjen dhe sigurinë.
Unioni i bën thirrje institucioneve dhe drejtuesve shtetërorë të shmangin retorikën nxitëse, të krijojnë hapësirë për dialog dhe të kërkojnë një zgjidhje të negociuar për të ndaluar përshkallëzimin. Për më tepër, dënohet çdo përdorim i pajustifikuar apo joproporcional i forcës nga policia, dhe theksohet se garantimi i rendit publik nuk mund të shërbejë si justifikim për cenimin e integritetit fizik, dinjitetit dhe drejtave themelore të qytetarëve, as për rrezikimin e jetës së protestuesve.
Unioni apelon për përgjegjësi dhe vetëpërmbajtje nga të gjitha palët; qeveria duhet të hapë rrugën e dialogut, ndërsa studentët duhet të zgjedhin përfaqësuesit me të cilët të negociohet. Zëri i të rinjve duhet të dëgjohet seriozisht dhe me respekt për të garantuar paqen sociale, sigurinë dhe vazhdimësinë e zhvillimit ekonomik.
