Kryetari i Grupit Parlamentar të Partisë Socialiste, Taulant Balla, bëri thirrje për dialog me studentët, duke theksuar se qeveria dhe Kryeministri kanë ofruar tryezën e bisedimeve për të diskutuar kërkesat e tyre. Balla u shpreh se studentët meritojnë të dëgjohen dhe se është koha për një “Pakt 2.0” për Universitetin. Ai njoftoi se ditën e enjte në Kuvend do të votohet një marrëveshje me Republikën Federale Gjermane dhe KfË-në për më shumë investime në përmirësimin e kushteve në konvikte, ndërsa theksoi se kushtet aktuale janë përmirësuar krahasuar me të kaluarën.
Gjatë fjalës së tij, Balla dënoi dhunën gjatë protestave në Tiranë, veçanërisht sulmet ndaj Policisë së Shtetit dhe dëmtimet e institucioneve e bizneseve. Ai deklaroi se goditja ndaj punonjësve të policisë përbën vepër penale dhe përsëriti se Grupi Parlamentar i Partisë Socialiste dënon dhunën. Si ish-Ministër i Brendshëm, Balla theksoi elementin thelbësor të ngritjes së dorës kundër policisë dhe bëri krahasime me protesta në vendet e tjera, duke pohuar se në Shqipëri një pjesë e madhe e të lënduarve që janë paraqitur në spital janë punonjës policie, ndryshe nga vende të tjera ku kryesisht lëndohen protestuesit.
Ai u shpreh kundër pjesëmarrjes së të miturve në protesta dhe i bëri thirrje prindërve të mos i lejojnë fëmijët të përdoren për qëllime politike. Balla theksoi nevojën që studentët të zgjedhin përfaqësuesit e tyre për dialog dhe se Kryeministri dhe Ministrja e Arsimit, si dhe ministra të tjerë, janë të gatshëm të ulen për të diskutuar.
Sa i përket sistemi arsimor, Balla njoftoi se mësimi po vijon në të gjitha shkollat. Ai gjithashtu përmendi ngarkesën parlamentare lidhur me ligjet që lidhen me procesin e negociatave për anëtarësimin në Bashkimin Evropian, duke paralajmëruar se ka afate të rëndësishme që duhen respektuar. Në përfundim ai cilësoi sulmin ndaj institucioneve si një ngjarje të rëndë, duke vënë në dukje se godina e sulmuar nuk ishte përballur me një situatë të tillë as në vitet 1997 dhe 1998.
