Qeveria miratoi dhënien e një shpërblimi financiar për 2 750 punonjës të Policisë së Shtetit, me arsyetimin e angazhimit të shtuar në garantimin e rendit dhe të sigurisë publike gjatë protestave në Tiranë. Vendimi u miratua në mbledhjen e Këshillit të Ministrave, dokumenti zyrtar mban datën 19 Tetor 2026 dhe ishte paraprirë nga paralajmërimi i kryeministrit Edi Rama.
Sipas vendimit, çdo punonjës që përfiton do të marrë shumën prej 269 120 lekësh, ndërsa fondi total i parashikuar për shpërblimet është 740 080 000 lekë. Ky fond do të shtohet në buxhetin e Ministrisë së Punëve të Brendshme, në zërin e shpenzimeve korrente të programit buxhetor “Policia e Shtetit”. Efekti financiar i këtij vendimi do të përballohet nga fondi rezervë i buxhetit të shtetit, i miratuar për vitin 2026.
Drejtoria e Përgjithshme e Policisë së Shtetit është ngarkuar të përcaktojë listën emërore të përfituesve bazuar në dokumentacionin justifikues dhe të kryejë procedurat për dhënien e shpërblimit. Për zbatimin e vendimit janë ngarkuar gjithashtu Ministria e Financave dhe Ministria e Punëve të Brendshme.
Në tekstin e vendimit përmenden edhe bazat ligjore mbi të cilat mbështetet, përfshirë nenin 100 të Kushtetutës dhe dispozita të ligjeve për menaxhimin e sistemit buxhetor dhe për Policinë e Shtetit, si dhe ligjin për buxhetin e vitit 2026. Pika e vendimit përcakton konkretisht shpërblimin për 2 750 punonjës, shumën individuale dhe shtimin e fondit prej 740 080 000 lekësh në zërin përkatës të Ministrisë së Punëve të Brendshme.
Vendimi është firmosur nga kryeministri Edi Rama, hyn në fuqi menjëherë dhe do të botohet në “Fletoren Zyrtare”.
