Kryeministri Edi Rama reagoi në rrjetet sociale lidhur me një deklaratë të nënshkruar nga disa organizata që kërkon nga përfaqësuesit politikë dhe drejtuesit e shtetit të shmangin retorikën nxitëse, të krijojnë hapësirë për dialog dhe të respektojnë të drejtën e protestës paqësore. Rama i bën thirrje udhëheqësve politikë të japin shembullin e dialogut dhe shpreh gatishmërinë e qeverisë për të qenë pjesë e tij.
Në reagimin e tij Rama kërkon distancim të qartë nga dhuna dhe aktet e rëndësishme që cenojnë sigurinë, duke përmendur konkretisht “gurët, zjarrvënien e institucioneve, keqpërdorimin e të miturve”, si dhe akuzon “dhunuesit që i prijnë maskaradës pseudo-studentore” si shkak që rrezikon të drejtën e protestës paqësore. Ai thekson nevojën për mbrojtjen e jetës dhe dinjitetit të çdo personi nga dhuna dhe manipulimi, duke nënvizuar se “Asnjë jetë nuk duhet vënë në rrezik dhe asnjë lojë nuk duhet bërë me jetën e vendit.” Rama fton të gjithë për dialog pa kushte: “Bujrum, DIALOG. Ku të doni. Kur të doni. Pa kushte”.
Në tekstin e deklaratës, organizatat kërkojnë nga përfaqësuesit e politikës dhe drejtuesit e shtetit të shmangin retorikën nxitëse, të krijojnë hapësirë për dialog, të respektojnë të drejtën e protestës paqësore dhe të mbrojnë jetën dhe dinjitetin e çdo personi, duke përsëritur se asnjë jetë nuk duhet vënë në rrezik.
Organizatat nënshkruese në deklaratë përfshijnë: Civil Rights Defenders, Shqipëri; SCiDEV; Rrjeti AËEN; Qendra Aleanca Gjinore për Zhvillim; Qendra “Faktoje”; Albanian Institute of Science AIS; Rrjeti Ballkanik për Gazetari Investigative në Shqipëri, BIRN Albania; Rrjeti Erasmus Tirana; Citizens.al; Qendra Amfora; Qendra për Mbrojtjen e Mjedisit dhe Zhvillim të Qëndrueshëm; Qendra për Ruajtjen dhe Mbrojtjen e Mjedisit Natyror në Shqipëri – PPNEA; Qendra Shqiptare për Kërkime Ekonomike – ACER; Partnerët Shqipëri për Ndryshim dhe Zhvillim; Qendra Për Studime të Krahasuara dhe Ndërkombëtare/QSKN; Qendra Shqiptare për Gazetari Cilësore; Rrjeti i Informimit dhe Qytetarisë Aktive INAC; Organizata ‘Together for Life’; Asosacioni i Gazetarëve të Shqipërisë ASHG; Rrjeti i Profesionistëve të Rinj; Fondacioni ‘Së Bashku’; Unioni i Gazetarëve Shqiptarë.
