Një tragjedi tjetër ndodhi gjatë orëve të para të mëngjesit në detin Egje, 3.5 milje në juglindje të ishullit grek të Mitilinit. Sipas rojës bregdetare greke, mes viktimave është edhe një grua dhe një bebe pak muajshe.
Autoritetet greke bëjnë me dije se ngjarja ndodhi gjatë ndjekjes së një skafi me emigrantë, i cili kishte hyrë në ujërat greke pa sinjalistikë. Drejtuesi i skafit, një shtetas turk 37 vjeç, refuzoi të ndalojë edhe pse roja bregdetare greke i bëri shenja disa herë. Në rrethana ende të paqarta, skafi i klandestinëve dhe ai i rojës bregdetare u përplasën; si pasojë 6 vetë u nxorën pa shenja jete, ndërsa 8 të tjerë, mes tyre dhe trafikanti 37-vjeçar, u shpëtuan.
Të shpëtuarit u dërguan në spital dhe ndodhen jashtë rrezikut për jetën. Në zonë po vazhdojnë kërkimet, pasi ka dyshime se ka ende persona të zhdukur në ujërat e ftohta të Egjeut. Lidhur me incidentin, prokuroria e Mitilinit urdhëroi një hetim urgjent. Po ashtu, ka nisur një hetim i brendshëm i rojës bregdetare greke për tejkalim kompetencash prej drejtuesit të barkës së rojës bregdetare.
Në zonë ndodhen edhe ekipe të Frontex, ndërsa zona e Egjeut lindor përmendet si një prej pikave më të nxehta të hyrjes së emigrantëve të paligjshëm drejt Bashkimit Europian.
Raporti i rojës bregdetare dhe veprimet hetimore synojnë të sqarojnë rrethanat e përplasjes dhe numrin e personave të përfshirë. Autoritetet vazhdojnë operacionet e kërkim-shpëtimit dhe hetimet për të verifikuar shkakun e incidentit dhe përgjegjësitë procedurale të përfshira. Top Channel.
