Mislav Karoglan debutoi në pankinën e Partizanit me një humbje të thellë, pasi skuadra u mposht 4-1 nga Vora në ndeshjen e javës së 7 të Kategorisë Superiore, duke thelluar krizën e të Kuqve. Ndeshja u vendos nga një performancë e fuqishme e Vorës dhe nga tre golat e realizuar nga Bernard Karrica.
Rezultati u zhbllokua në minutën e 17, kur Karrica shënoi për Vora dhe i dha avantazhin skuadrës së tij. Në fillimin e pjesës së dytë, po ky futbollist shënoi sërish, kësaj here nga pika e bardhë e penalltisë, për të çuar shifrat në 2-0. Partizani arriti të rikthehej në lojë në minutën e 62, kur Human realizoi penaltinë e tij për të ngushtuar diferencën në 2-1.
Megjithatë, Vora reagoi shpejt dhe riktheu epërsinë dygolëshe kur Pedro Clemente shënoi golin e tretë, ndërkohë që skuadra e trajnerit Bellaj pati edhe një gol të anuluar gjatë sfidës. Në minutat shtesë të ndeshjes, Karrica kompletoi tregolëshin e tij personal, duke fiksuar rezultatin përfundimtar 4-1 në favor të Vorës.
Fitorja ngjiti Vorën në kuotën e 5 pikëve, duke e çuar atë në vendin e parafundit në renditje. Ndërsa Partizani, me Karoglan në krye të pankinës për herë të parë, doli i mundur dhe kriza e skuadrës u thellua pas disfatës së kësaj jave. Sulmet dhe penalltitë luajtën rol vendimtar në ecurinë e takimit; dy penallti u shënuan dhe një gol u anullua për skuadrën e Bellajt, por momentet kyçe mbetën realizimet e Karricës dhe goli i Clementes për Vora. (Top Channel)
