Oliver Bierhoff, ish-sulmues i Milanit dhe ish-menaxher i kombëtares gjermane, vlerëson përparimin e sulmuesit Nicolò Tresoldi dhe e konsideron atë një zgjidhje të mundshme për problemet e Gjermanisë në repartin ofensiv. Në një intervistë për gazetarin Martin Volkmar të ProSieben, Bierhoff theksoi se Tresoldi ka bërë hapa të rëndësishëm përpara, sidomos pas përvojës jashtë vendit: është përforcuar fizikisht, ka fituar më shumë besim dhe ka treguar se mund të përballojë nivele më të larta të futbollit ndërkombëtar, duke shënuar edhe në Champions League.
Bierhoff shpjegoi se Federata Gjermane e Futbollit është aktualisht në kontakt me lojtarin dhe shprehu besimin se, nëse vazhdon me këtë ritëm, “mund të zgjidhë problemin e sulmuesve te kombëtarja gjermane”. Ai nuk e fshehu dëshirën që Tresoldi të zgjedhë Gjermaninë, duke argumentuar se skuadra ka nevojë për çdo talent të vlefshëm, veçanërisht në sulm. Megjithatë, Bierhoff theksoi se vendimi i lojtarit nuk duhet të bazohet vetëm në kriterë sportivë: “Shpresoj, natyrisht, që të zgjedhë Gjermaninë, sepse kemi nevojë për çdo talent, sidomos në sulm. Megjithatë, besoj se vendimi nuk duhet të merret vetëm mbi kritere sportive, por edhe me zemër”.
Tresoldi, i cili ka lidhje me Italinë dhe Gjermaninë, ende nuk ka vendosur se cilën përfaqësuese kombëtare do të zgjedhë në nivelin e të rriturve, dhe zgjedhja e tij pritet të jetë një çështje e rëndësishme për shkak të potencialit dhe interesit për shërbimet e tij ndërkombëtare. Bierhoff gjithashtu trajtoi mundësinë që sulmuesi të luajë një ditë për Milanin, klub ku ai vetë pati një lidhje të veçantë. Tresoldi ka shfaqur simpatinë për kuqezinjtë, dhe sipas Bierhoff, ka cilësitë për të luajtur në një skuadër të këtij niveli, duke shtuar se “Milani sot nuk është në nivelin e kohës kur pata privilegjin të luaja atje, por Tresoldi ka potencialin për të luajtur në një klub kaq të madh dhe me famë ndërkombëtare”.
